2017-ci il mayın 25-də AHİK-də Tacikistan Müstəqil Həmkarlar İttifaqları Federasiyası və Azərbaycan Həmkarlar İttifaqları Konfederasiyası arasında qarşılıqlı fəaliyyət və əməkdaşlıq haqqında Memorandumun imzalanması mərasimi keçirilib.
AHİK-in mətbuat və ictimaiyyətlə əlaqələr şöbəsindən baki-xeber.com-a verilən məlumata görə, mərasimdə çıxış edən AHİK sədri, Beynəlxalq Həmkarlar İttifaqları Konfederasiyasının (BHİK) vitse-prezidenti, Milli Məclisin deputatı Səttar Mehbalıyev qonaqları salamlayaraq ölkələrimiz və xalqlarımız arasındakı qardaşlıq əlaqələrinin Azərbaycanda yüksək qiymətləndirildiyini diqqətə çatdırıb. Qeyd edib ki, AHİK başqa ölkələrin həmkarlar ittifaqı mərkəzləri ilə qarşılıqlı əməkdaşlığa yüksək önəm verir: "Bizim təşkılat Ümumhəmkarlar İttifaqları Konfederasiyası çərçivəsində Tacikistan Həmkarlar İttifaqları Federasiyası ilə sıx əməkdaşlıq edir. Bildiyiniz kimi, Azərbaycan da Tacikistan kimi qədim mədəniyyətlər və ənənələr ölkəsidirlər. Hər iki ölkə dünyaya bir çox mütəfəkkirlər, filosoflar, alimlər, şairlər, müsiqiçilər, rəssamlar bəxş edib".
S.Mehbalıyev diqqətə çatdırıb ki, son 10 ildə Prezident İlham Əliyevin rəhbərliyi altında Azərbaycan beynəlxalq ictimai-siyasi və idman tədbirlərinin keçirildiyi məkana çevrilib: "Qeyd etmək lazımdır ki, bu günlərdə Tacikistanın milli komandası Bakıda keçirilən İV İslam Oyunlarının iştirakçısı olub və idmanın bir sıra növləri üzrə yarışlarda uğurla çıxış edib. Bu gün Azərbaycan, Ermənistanın hərbi təcavüzünə məruz qalmasına baxmayaraq, öz potensialını səfərbər edərək demokratik inkişaf yolunda, hüquqi, dünyəvi, sosial dövlət quruculuğu yolunda böyük uğurlar qazanıb".
AHİK sədri daha sonra Azərbaycan Həmkarlar İttifaqlarının strukturu və fəaliyyəti haqqında qonaqlara məlumat verib. Bildirib ki, Konfederasiyanın başlıca vəzifələri həmkarlar ittifaqı üzvlərinin maddi rifahının yüksəlməsinə, əmək şəraitinin, məişət və istirahətinin yaxşılaşdırılmasına hərtərəfli kömək göstərilməsi, onların maraqlarının və hüquqlarının dövlət və icra orqanlarında təmsil edilməsidir. Sahə kollektiv sazişləri və ərazi kollektiv müqavilələrinin uğurla həyata keçirildiyini deyən Konfederasiya sədri qeyd edib ki, 1996-cı ildən Azərbaycan hökuməti, Həmkarlar İttifaqları Komfederasiyası və Sahibkarların (İşəgötürənlərin) Milli Konfederasiyası arasında Baş Kollektiv Saziş imzalanır: "Saziş iki il nüddətinə bağlanır, bununla belə biz sosial tərəfdaşlarla hər il Sazişin yerinə yetirilmə şərtlərini təhlil edirik. Azərbaycan Həmkarlar İttifaqları qanunvericilik sahəsində fəal iştirak edir və ölkənin əmək qanunvericiliyinin təkmilləşdirilməsi prosesinə real təsir göstərirlər. Son illərdə həmkarlar ittifaqlarının təklifləri ilə AR Əmək Məcəlləsinə, "Həmkarlar İttifaqı haqqında" Qanuna, "İnzibati hüquqpozmalar haqqında" və s.qanunlara 100-dən artıq dəyişiklik və düzəlişlər edilib. AHİK beynəlxalq həmkarlar ittifaqları arasında həmrəyliyin inkişafı mövqeyindən çıxış edərək dünyanın bir çox ölkələrinin həmkarlar ittifaql təşkilatları ilə əməkdaşlıq edir".
AHİK sədri çıxışının sonunda deyib ki, bu gün Tacikistan Müstəqil Həmkarlar İttifaqları Federasiyası və Azərbaycan Həmkarlar İttifaqları Konfederasiyası arasında qarşılıqlı fəaliyyət və əməkdaşlıq haqqında Memorandumumun imzalanmasında başlıca məqsəd həmkarlar ittifaqı həmrəyliyinə əsaslanaraq ikitərəfli əməkdaşlığı inkişaf etdirmək, həmkarlar ittifaqı üzvlərinin və onların ailələrinin istirahətinin və sağlamlaşdırılmasının təşkil edilməsinə yardım göstərməkdir: "Biz ikitərəfli əlaqələrimizi muzdlu işçilərin hüquq və mənafelərinin qorunması sahəsində həmkarlar ittifaqlarının təcrübə mübadiləsinə yönəldəcək, həmkarlar ittifaqı quruculuğunin prinsipial məsələlərində beynəlxalq təşkilatlarda öz mövqelərimizi və fəaliyyətimizi razılaşdırmağa səy göstərəcəyik".
Tacikistan Müstəqil Həmkarlar İttifaqları Federasiyasının sədri Qadiri Qosim çıxış edərək Azərbaycanda mehriban və səmimi qarşılandıqlarına görə AHİK-in sədri S.Mehbalıyevə təşəkkürünü bildirib. Qonaq ölkələrimiz arasındakı dostluq və qardaşlıq münasibətlərindən və qarşılıqlı əməkdaşlıqdan danışaraq gələcəkdə bu əməkdaşlığın daha da möhkəmlənəcəyinə əminliyini ifadə edib. Qədim tarixə və mədəniyyətə malik olan xalqlarımızın bundan sonra da inkişaf etməsini və tərəqqisini arzulayıb. Azərbaycan və Tacikistan həmkarlar ittifaqları arasında qarşılıqlı fəaliyyət və əməkdaşlıq haqqında Memorandumun imzalanmasının mövcud əməkdaşlığımız sahəsində yeni bir səhifə açacağını bildirib.
Sonra qarşılıqlı fəaliyyət və əməkdaşlıq haqqında Memorandumun imzalanması mərasimi olub. Memorandumu Azərbaycan tərəfindən Səttar Mehbalıyev və Tacikistan tərəfindən Qadiri Qosim imzalayıb.
