Seyid Camal Əzimbəyli: "Evlərdə hücrələr formasında, Quran kursları adı altında Azərbaycanın milli maraqlarını heçə sayan ünsürlərin toplaşması faktı var"
Bu gün bəzi şəxslər müqəddəs kitabımız olan Quranın qanunsuz şəkildə tədrisi ilə məşğuldur. Onlar evdə Quran dərsi keçir. Ancaq, əslində, evdə Quran dərsi keçmək qanunvericiliyə ziddir.
Dini Qurumlarla İş üzrə Dövlət Komitəsinin sədri Mübariz Qurbanlı media nümayəndələrinə açıqlamasında deyib ki, bütün Quran kursları Qafqaz Müsəlmanları İdarəsində qeydiyyata alınmalı və rəsmiləşdirilməlidir: "Bu işlə məşğul olan və özünü axund, imam kimi təqdim edən şəxslər qanun qarşısında cavab verməli olacaq. Heç bir səlahiyyəti və təyinatı olmayanlar Quran kursu adı altında gəncləri radikal qrupların təsiri altına sala bilər. Nəyin bahasına olursa-olsun, kənardan ümumi islami dəyərlərə xələl gətirən və zərbə vuran cərəyanların Azərbaycana ayaq açmasına yol verməməliyik".
Evdə keçirilən Quran dərslərinin nə kimi təhlükəsi var? Mövzu ilə bağlı mütəxəssisə müraciət etdik.
Şərqşünas Seyid Camal Əzimbəyli "Bakı-Xəbər"ə açıqlamasında qeyd etdi ki, M.Qurbanlı tutduğu vəzifəsinə və siyasi fəallığına görə kifayət qədər məlumatlı şəxsdir: "Azərbaycan dövlətinin mənafeyini fikirləşən bir şəxs olaraq, o bu gün ölkəmizdə çoxlu sayda Quran kursları adı altında evlərdə məzhəblərə bölüşmüş şəkildə fəaliyyət göstərən təhlükə mənbələrinin var olduğunu bilir. Dəfələrlə mətbuata açıqlamalarımda qeyd etmişəm ki, təhsil kursları adı altında insanlara yad düşüncələr aşılanır. Kütləvi şəkildə evlərdə Quran kurslarının keçirilməsi faktları aşkar olunubsa, aidiyyəti qurumlar məlum məsələ ilə bağlı müəyyən işlər görür. Evlərdə hücrələr formasında, Quran kursları adı altında Azərbaycanın milli maraqlarını heçə sayan ünsürlərin toplaşması faktı var. Bu bir reallıqdır. O baxımdan dövlətin bu məsələyə xüsusi nəzarət etməsini dəstəkləyirəm".
Günel CƏLİLOVA
