Rəsul Cahangirli: "Xaricdə təhsil alanlarla yanaşı, digərləri də dövlət qulluğunda fəaliyyət göstərə bilər"
Azərbaycanda "Dövlət qulluğu haqqında" Qanuna dəyişiklik edilir. Dəyişikliyin mahiyyəti ondan ibarətdir ki, xaricdə təhsil alan şəxslər dövlət qulluğuna imtahansız götürüləcək. Milli Məclisdən verilən məlumata görə, bununla bağlı "Dövlət qulluğu haqqında" Qanuna yeni maddə əlavə edilir.
Əlavəyə görə, Azərbaycan gənclərinin xarici ölkələrdə təhsili üzrə müvafiq icra hakimiyyəti orqanı tərəfindən təsdiq olunmuş Dövlət Proqramı çərçivəsində xaricdə təhsil almış şəxslərin dövlət qulluğuna qəbulu zamanı bu qanunun 28.1-ci maddəsi (28.1 Dövlət qulluğuna qəbul müsabiqə yolu ilə aparılır. Müsabiqə test imtahanından və müsahibədən ibarətdir) tətbiq edilmir.
Həmin şəxs vakant dövlət qulluğu vəzifəsinin aid olduğu dövlət orqanına müraciət edərək, tələb olunan sənədləri təqdim etməlidir. Sənədlər təqdim edildikdən sonra həmin şəxs 5 iş günü müddətində dövlət orqanının rəhbərinə təqdim olunur. Dövlət orqanının rəhbəri həmin şəxsi stajçı kimi qulluğa qəbul etməli və vakant dövlət qulluğu vəzifəsinə təyin etməlidir. Həmin şəxsin stajçı kimi qulluğu, habelə onun sınaq müddəti ərzində qulluq keçməsi və daimi dövlət qulluğuna qəbul edilməsi ilə bağlı məsələlər bu qanunun 28.7-ci maddəsi ilə tənzimlənir. Qanuna dəyişiklik Milli Məclisin mayın 31-də keçirilən iclasında müzakirə ediləcək.
O da məlumdur ki, bir sıra hallarda xaricdə təhsil alanlar qayıtdıqdan sonra iş tapa bilmir. Nəticədə onların bir çoxu digər ölkələrə üz tutmalı olur. Yaxud da ölkədə ixtisası üzrə deyil, başqa sahədə çalışır. O baxımdan belə bir yeniliyin qəbul olunması təşəbbüsünə ekspertlər necə yanaşır? Məsələyə münasibət bildirən ekspert Rəsul Cahangirli buna müxtəlif prizmadan yanaşdı: "Ümumən götürəndə xaricdə təhsil alanların işlə təmin olunmasına bu müsbət təsir göstərə bilər. Ancaq hesab edirəm ki, belə imtiyazların verilməsi digərlərinin seçim imkanına mənfi təsir göstərməməlidir. Çünki xaricdə yüksək səviyyəli təhsil alan şəxs üçün dövlət qulluğuna qəbulla bağlı keçirilən müsabiqədə ciddi nəticə ortaya qoymaq, prinsipcə, çətin olmamalıdır. Ola bilsin ki, müsabiqədə hansısa subyektiv amillər buna müəyyən maneələr yaradır. Bu baxımdan onların imtahansız işə götürülməsi problemi aradan qaldırır. Ancaq digərlərini də nəzərə almaq lazımdır. Məsələ ondadır ki, dövlət qulluğuna qəbulda yüksək göstərici ortaya qoyanlar var. Bu amildən çıxış edərək mexanizmi elə qurmaq lazımdır ki, digərlərinin hüququ pozulmasın. Fikrimcə, belə olsa, o zaman obyektivlik təmin olunacaq. Xaricdə təhsil alanlarla yanaşı, digərləri də dövlət qulluğunda fəaliyyət göstərə bilər". Vidadi ORDAHALLI
