Bahadur Bilalov: "Azərbaycan turizminin inkişaf etməsində bu tədbirlərin böyük rolu var"
Azərbaycan son dövrdə inkişaf tempini sürətləndirərək, dünyanın aparıcı və inkişafda olan ölkələri sırasında öz mövqeyi, eləcə də mövcud potensialı ilə seçilir. Qısa bir dövr ərzində əldə olunan nailiyyətlər ölkənin milli maraqları zəminində formalaşıb, eləcə də dövlət tərəfindən həyata keçirilən milli strategiya məhz belə imicin Azərbaycan ətrafında yaranmasına gətirib çıxarıb. Sözsüz ki, bu uğurlar, nailiyyətlər Azərbaycanın iqtisadi tərəqqisinə, əhalinin sosial rifahının yüksəlməsinə gətirib çıxarıb.
Prezident İlham Əliyev tərəfindən turizmin inkişafına göstərilən diqqətin nəticəsidir ki, bu gün Azərbaycan perspektivli turizm ölkəsinə çevrilib. Azərbaycanın turizm coğrafiyası genişlənib.
Bu gün ölkəmizə çoxlu sayda turist gəlir. Ölkəmizdə keçirilən beynəlxalq əhəmiyyətli idman yarışlarını izləmək üçün çoxlu sayda turist paytaxt Bakının qonağı olur.
"Bakı-2017" IV İslam Həmrəyliyi Oyunları da artıq yekunlaşdı. Oyunları izləmək üçün gələn turistlər Azərbaycanın tarixi abidələrini də ziyarət edib.
İslam Oyunları günlərində Qobustan Milli Tarix-Bədii Qoruğunu ümumilikdə 9 min 201 nəfər ziyarət edib.
Qoruğun yaydığı məlumata əsasən, ziyarətçilərdən 3573 nəfəri xarici, 1826 nəfəri isə yerli turistlərdir. Eyni zamanda, 3513 məktəbli, 289 tələbə qoruğun turizm imkanları ilə tanış olub.
Qeyd edək ki, İslam Oyunları günlərində tək Qobustan Milli Tarix-Bədii Qoruğunu ümumilikdə 9 min 201 nəfər ziyarət edibsə, digər tarixi abidələri ziyarət edənlərin sayı daha çoxdur.
Turizm sahəsi üzrə ekspert Bahadur Bilalov "Bakı-Xəbər"ə açıqlamasında qeyd etdi ki, beynəlxalq əhəmiyyətli idman tədbirlərinin keçirilməsi ölkəyə turist axınına səbəb olur: "Təbii ki, əcnəbi vətəndaş ilk dəfə səfər etdiyi ölkədə onun tarixi abidələri, mədəniyyəti, tarixi ilə maraqlanacaq. Bu üzdən, İslam Oyunları günlərində Qobustan qoruğuna səfər edən turistlərin sayı artıb. Tək Qobustan qoruğunu deyil, digər tarixi abidələrimizi də ziyarət edən turistlərin sayı heç də az deyil. Bəzi ağzıgöyçəklər deyir ki, bu yarışların bizə nə kimi xeyri var? Həmin insanlar dərk edə bilmir ki, gələn turistlər tək yarışı izləmir. Onlar bizim sosial-iqtisadi, mədəni həyatımızla da maraqlanır. Azərbaycan turizminin inkişaf etməsində bu tədbirlərin böyük rolu var".
Həmsöhbətimizin sözlərinə görə, İslam Oyunları bitsə belə, turistlərin Azərbaycana marağı daha da artacaq. Turistlərin sayının günü-gündən artmasının şahidi olacağıq.
Günel CƏLİLOVA
