Adil Qeybulla: "Xeyirxah Həkimlər Kanalının açılması yaxşıdır, ancaq belə bir layihə problemi tam həll edə bilməz"
Bu gün sosial durumu ağır olan ailələr səhhəti ilə bağlı həkimə müraciət etməkdə çətinlik çəkir. Elə xəstələr var ki, onların səhhətinin normal vəziyyətə düşməsi üçün mütləq əməliyyat olunmalıdır. Lakin maddi durumları buna imkan vermir. Artıq vətəndaşların bu kimi problemləri olmayacaq. Cərrahi əməliyyat olunmaq istəyənlərə köməklik göstərmək üçün Azərbaycanda ilk və yeganə peşəkar portal - Xeyirxah Həkimlər Kanalı fəaliyyətə başlayıb.
Əməliyyat olunacaq adamların lazımi məbləğdə ödəniş etməyə imkanı çatmırsa, sağlamTV.az - Xeyirxah Həkimlər Kanalına müraciət edir. Bu kanal eyni əməliyyatı daha sərfəli məbləğdə və ya sərfəli şərtlərlə icra edən həkim-mütəxəssisləri rahatlıqla tapır. Xəstələrə köməklik göstərməyə hazır olan cərrahlar isə Xeyirxah Həkimlər Kanalını formalaşdıran müxtəlif ixtisaslı tanınmış uzman həkimlərdir. Həmin həkimlər paytaxtın tanınmış klinikalarında çalışan, xarici ölkələrdə təhsil və təcrübə keçmiş, olduqca təcrübəli və aparıcı mütəxəssislərdir.
Belə bir portalın yaranması sosial durumu ağır olan ailələrin sevindirir.
Məsələ ilə bağlı fikir bildirən tibb sahəsi üzrə ekspert Adil Qeybulla "Bakı-Xəbər"ə açıqlamasında qeyd etdi ki, bu cür tədbirlər problemi həll etmir: "Bu gün sosial durumu ağır olan ailələr yetərincədir. Heç bir Xeyirxah Həkimlər Kanalı və ya hansısa pilot layihə məsələni tam həll edə bilməz. Əlbəttə, indiki durumda bu təşəbbüs alqışlanmalıdır. Ancaq unutmaq lazım deyil ki, bu tipli layihələr məsələnin son həllinə nail olmur. Yaxşı olar ki, icbari tibbi sığorta məsələsi tezləşdirilsin. Belə olan halda, dövlət xəstəxanalarında vacib cərrahi əməliyyatların, lazımi müayinələrin pulsuz aparılmasına imkan yaranardı".
Günel CƏLİLOVA
