Şahin Camalov: "Çünki onları təlqin edən, arxasınca gedən, etdiklərini təkrar etmək istəyən yüzlərlə insan var"
Sosial şəbəkələrdə tez-tez müğənnilərin, tanınmış simaların sükan arxasında selfi çəkdiyinin şahidi olmuşuq. Məhz bu səbəbdən məşhurların zaman-zaman qəza törətməsi qaçılmaz olub. Eyni zamanda, belə xoşagəlməz hallar cəmiyyətdə birmənalı qarşılanmır. Məsələnin ən pis tərəfi odur ki, bəzi cavanlar onlara bu yöndə bənzəməyə çalışır. Yəni görəndə ki, hansısa tanınmış müğənni o cür hallara yol verir, gənclər də onların hərəkətini təkrarlayır. Bu da, nəticə etibarilə, qəza risqini artırır.
Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov mətbuata açıqlamasında belə hallara qarşı daha ciddi tədbirlərin görüləcəyini bildirib: "Sükan arxasında diqqəti yayındıra biləcək hərəkətlərin edilməsinə görə inzibati məsuliyyət var. Belə hadisələrə rast gələndə sürücünü inzibati məsuliyyətə cəlb edirik. "Yol hərəkəti haqqında" Qanunda törədilən xətaların internet vasitəsilə sosial şəbəkələrdə yayımlanması inzibati araşdırma aparılmasına əsas verir və bunu törədənlər inzibati məsuliyyətə cəlb olunur.
Sükan arxasında məşhurlar belə olsa, xəta törədib sosial şəbəkədə yayırsa, onlar barəsində tədbir görməyə əsas yaranır. İnzibati həbs belə ola bilər. Cərimənin rüsumu isə sürücünün pozduğu qanuna əsasən müəyyənləşdirilir. Tutaq ki, kimsə telefonla danışır, həm də özünü videoya çəkib sosial şəbəkədə paylaşırsa, həmin şəxs 50 manat miqdarında cərimə olunur".
Hər halda, belələrinin inzibati məsuliyyətə cəlb olunması problemin həllinə müəyyən qədər təsir göstərə bilər. Maraqlıdır, bəs ekspertlər buna necə yanaşır?
Məsələyə münasibət bildirən "Təhlükəsiz yol" Alyansının koordinatoru Şahin Camalovun sözlərinə görə, bu istiqamətdə sərt tədbirlərin görülməsi vacibdir: "Çünki qanun hamı üçün qanundur. Qarşı tərəfin kimliyindən, hansı sosial statusa sahib olmağından asılı olmayaraq, qanunun tələbləri hamıya aiddir. Ona görə də bununla bağlı səslənən fikirləri haqlı hesab edirəm, müvafiq addımlar atılmalıdır. Ümumiyyətlə, sosiallaşmış, daha çox ictimailəşmiş şəxslər bu məsələdə daha diqqətli olmalıdır. Çünki onları təlqin edən, arxasınca gedən, etdiklərini təkrar etmək istəyən yüzlərlə insan var. O üzdən, müğənnilər bu məsələdə digərlərinə baxanda daha diqqətli olmalıdır. Ən azından, başqalarına yaxşı nümunə olmaq baxımından bu vacibdir. Müğənnilərin bu cür hərəkətləri qanun pozuntusudur. Buna başqa ad vermək mümkün deyil. Qanun belə hallara yol vermir. Hesab edirəm ki, belə hallara qarşı daha sərt mübarizə aparmaq lazımdır. Belə müğənnilərin daha sərt cəzalandırılması effektiv nəticə verə bilər. Ona görə ki, onların sahib olduğu status cəmiyyətdə müəyyən rezonans yarada bilər. Nəticədə digərləri buna baxıb nəticə çıxaracaq".
Vidadi ORDAHALLI
