Məhərrəm Zülfüqarlı: "Qısa müddət ərzində Naxçıvanda 21 məktəbin inşa olunub təhvil verilməsi həmin bölgədə təhsilə yüksək diqqət göstərilməsi ilə bağlıdır"
Son üç ildə Naxçıvanda 21 məktəb inşa olunub. Məlumata əsasən, 2014-2017-ci illər ərzində Naxçıvan Muxtar Respublikasında 5974 şagird yerlik 21 ümumtəhsil məktəbi tikilib. Muxtar Respublikanın Statistika Komitəsinin yaydığı məlumatda qeyd olunur ki, ötən müddət ərzində 13748 şagird yerlik 30 ümumtəhsil məktəbi yenidən qurulub və ya əsaslı təmir olunub.
Hazırda Naxçıvan şəhərinin Qaraxanbəyli, Babək rayonunun Payız, Ordubad rayonunun Üstüpü, Culfa rayonunun Dizə kəndlərində məktəb binalarının tikintisi davam etdirilir. Kəngərli rayonunun Qıvraq qəsəbəsində 224, Babək qəsəbəsi və Şahbuz şəhərində hər biri 242 yerlik uşaq bağçası binaları tikilib, Naxçıvan Əlahiddə Sərhəd Diviziyasının hərbi şəhərciyində 72 yerlik uşaq bağçası binasının yenidən qurulması başa çatdırılıb. Naxçıvan şəhərində iki, Culfa rayonunun Bənəniyar və Sədərək rayonunun Sədərək kəndlərinin hər birində bir uşaq musiqi məktəbi binasının tikintisi başa çatdırılıb.
Son üç il ərzində Muxtar Respublikada 21 orta məktəbin inşa olunması həmin regionda təhsilə önəm verilməsindən irəli gəlir.
Təhsil sahəsi üzrə ekspert Məhərrəm Zülfüqarlı "Bakı-Xəbər"ə açıqlamasında qeyd etdi ki, qısa müddət ərzində Naxçıvanda 21 məktəbin inşa olunub təhvil verilməsi həmin bölgədə təhsilə yüksək diqqət göstərilməsi ilə bağlıdır: "Həmçinin, Muxtar Respublikada iqtisadi inkişafın olması bu sahənin inkişafına səbəb olur. İqtisadi inkişaf olmasa idi, təbii ki, məktəb tikintisi üçün vəsait ayrılmazdı". M.Zülfüqarlı bildirdi ki, adıçəkilən bölgədə üç il ərzində 21 məktəbin inşa olunması oradakı məktəblilərin təhsil səviyyəsinin artırılması baxımından müsbət göstəricidir.
Həmsöhbətimizin sözlərinə görə, son illər Muxtar Respublikanın iqtisadi inkişafı tək təhsilin inkişafına deyil, eyni zamanda, mədəniyyətə də öz müsbət təsirini göstərir: "Artıq mədəniyyət sahəsində də inkişaf nəzərə çarpır".
Günel CƏLİLOVA
