Rafiq İsmayıl: "Sosial məzuniyyətə çıxan müəllimlərin dərs yükünün vakansiyaya çıxarılmasının qarşısının alınması vacibdir"
Xəbər verildiyi kimi, məktəblərdə sosial məzuniyyətə çıxanların dərs yükü vakansiyaya çıxarılmayacaq. Bu, "Təhsil Nazirliyi sisteminə daxil olan ümumtəhsil müəssisələrində müəllimlərə tələbatın müəyyənləşdirilməsi, pedaqoji kadrların işə qəbulu və yerdəyişməsi qaydaları"nda öz əksini tapıb.
Qaydalara əsasən, sosial məzuniyyətdə olan müəllimlərə hər dərs ilinin əvvəlində tarifləşmə cədvəlində həftəlik dərs yükü ayrılır və əmrləşdirilir. Sosial məzuniyyətdə olan müəllimlərin dərs yükü ilə bağlı aşağıdakı ardıcıllıq gözlənilməklə qərar qəbul edilir. Bu zaman dərs yükü müəssisədə çalışan müəllimlər arasında bölüşdürülür, digər məktəblərdən əvəzçiliklə ixtisaslı müəllim dəvət edilir, mərkəzləşdirilmiş müsabiqədə iştirak edərək keçid balı toplamış namizədlə yerli təhsili idarəetmə orqanı və ərazi maliyyə hesablaşma mərkəzi ilə razılaşdırılmaqla əmək müqaviləsi bağlanır.
Qaydalara uyğun olaraq, məhkəmənin qərarına əsasən, yaxud sağlamlığı ilə əlaqədar pedaqoji fəaliyyət göstərməsi qadağan olunan şəxslər müəllimlərin işə qəbulu müsabiqəsinə buraxılmır.
Müəllimlərin yeni tədris ili üçün dərs yükü müəssisə rəhbəri tərəfindən müəllimlər əmək məzuniyyətinə çıxanadək müəyyənləşdirilir və onlara bu barədə məlumat verilir. Müəllimlərin dərs yükü tədris ili ərzində, bir qayda olaraq, sabit saxlanır. Dərs yükü bölüşdürülərkən mövcud qanunvericiliyin tələbləri, müəllimlərin diaqnostik qiymətləndirmədə göstərdiyi nəticələri nəzərə alınır. Dərs bölgüsü aparılarkən müəssisədə işləyən müəllim üçün həftəlik dərs yükü 18 saat (bu zaman həftəlik dərs yükü 2 stavkadan artıq olmamalıdır) müəyyənləşdirilir. Vakant dərs yükü 18 saatdan az olarsa, həmin saatlar ilk növbədə müəssisənin ixtisaslı müəllimləri arasında bölüşdürülür. Müəssisədə hər hansı ixtisasdan kadr olmadıqda, həmin ixtisas üzrə tədris planına əsasən müəyyənləşdirilmiş həftəlik dərs yükü 18 saatadək olduğu halda, digər müəssisələrdən əvəzçiliklə və ya saathesabı qaydasında müəllim dəvət olunması məsələsinə baxılır, bu mümkün olmadıqda, həmin dərs saatları vakant hesab olunur və müsabiqəyə çıxarılması üçün təqdim edilir.
Ekspertlərin fikrincə, sosial məzuniyyətə çıxanların dərs yükünün vakansiyaya çıxarılmaması düzgün qərardır.
Təhsil sahəsi üzrə ekspert Rafiq İsmayıl "Bakı-Xəbər"ə açıqlamasında qeyd etdi ki, sosial məzuniyyətə çıxan müəllimlərin dərs yükünün vakansiyaya çıxarılmasının qarşısının alınması vacibdir: "İstər analıq məzuniyyəti, istərsə də müxtəlif səbəblərdən məzuniyyətə çıxan müəllimin dərslərinin başqa bir müəllimə verilməsi düzgün deyil. O pedaqoqun məzuniyyəti bitəndən sonra əvvəlki dərs yükü ilə təmin olunmurdu. Təbii ki, bu hal onun əməkhaqqına da təsir edirdi".
Həmsöhbətimizin sözlərinə görə, sosial məzuniyyətə çıxan müəllimlərin yerinə başqa bir pedaqoq deyil, əvəzedici götürülməlidir: "Belə olan halda, həm məzuniyyətdə olan müəllim rahat olacaq ki, onun dərs yükü olduğu kimi qalır, həm də şagirdlər biləcək ki, müəllimləri yaxın müddətdə onlara yenidən dərs deyəcək".
Günel CƏLİLOVA
