Şəmsəddin Əliyev: "Bu onu göstərir ki, DİN əməkdaşları öz işlərinə yüksək səviyyədə yanaşmaqla yanaşı, idmana da diqqətlə yanaşır"
Azərbaycanda keçirilən IV İslam Həmrəyliyi Oyunlarında Daxili İşlər Nazirliyinin (DİN) 17 idmançı əməkdaşı qələbə uğrunda mübarizəyə qatılıb. Artıq onlar ölkəmizin medal mücrüsünə 5 qızıl, 1 gümüş medal qazandırıb.
Azərbaycan yığma komandasına "Bakı-2017" IV İslam Həmrəyliyi Oyunlarında ilk qızıl medalı DİN Daxili Qoşunlarının giziri Ruslan Lunyev qazandırıb. O bu uğurunu atıcılıq üzrə sonrakı yarışlara qatılmaqla yenidən təkrar edib, komandaya ümumilikdə dörd qızıl medal qazandırıb.
Qeyd edək ki, Ruslan bu yarışda anası, DİN Daxili Qoşunlarının veteranı, istefada olan mayor İradə Aşumova ilə birgə mübarizə aparıb. İ.Aşumova Afina Olimpiadasının bürünc medalçısı, dəfələrlə Dünya və Avropa çempionatlarının mükafatçısı olub.
Karatenin kumite yarışlarında mübarizə aparan DİN Daxili Qoşunlarının əsgəri, iki il əvvəl ölkəmizdə təşkil olunan İlk Avropa Oyunlarının qalibi Ayxan Mamayev səkkizdəbir finalda iordaniyalı Sayan Mahmudu 7:1 hesabı ilə məğlub edib. Azərbaycan idmançısı dörddəbir finalda əlcəzairli Mauad Açhaçeyə 5:3, yarımfinalda özbəkistanlı Əbdüləziz Ataboyevə isə 3:1 hesabı ilə qalib gələrək, finalda türkiyəli Alparslan Yamanoğlunu 1:0 hesabı ilə məğlub edərək IV İslam Həmrəyliyi Oyunlarının qızıl medalına sahib olub.
IV İslam Həmrəyliyi Oyunlarında paracüdo yarışlarında Xəzər Rayon Mühafizə İdarəsinin əməkdaşı, polis serjantı Kənan Abdullaxanlı komandanın hesabına gümüş medal qazandırıb.
Görünən odur ki, idman oyunlarında DİN-i təmsil edən idmançılar çox yüksək göstərici ortaya qoyurlar. Bütövlükdə, bu uğurlar nəyin göstəricisidir?
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyev bunu bir sıra amillərlə əlaqələndirdi: "Bu, sözügedən qurumun bütün sahələrdə peşəkarlığının və bir də vətənə, dövlətçiliyə sədaqətin bariz nümunəsidir. Məsələ ondadır ki, burada prinsipiallıq var, sədaqət nümayiş etdirilir. Təbii ki, burada bacarıq, qabiliyyət də önəmlidir. Bu onu göstərir ki, DİN əməkdaşları öz işlərinə yüksək səviyyədə yanaşmaqla yanaşı, idmana da diqqətlə yanaşır. Hesab edirəm ki, DİN-i təmsil edən idmançıların bu cür uğur əldə etməsinin kökündə məhz bu faktorlar dayanır. Ona görə də bu cür uğurlu nəticə ortaya qoyulub. Fikrimcə, bu hələ son deyil. Oyunlar bitənə qədər əldə olunan medalların sayı daha da artacaq".
Vidadi ORDAHALLI
