"İctimai Problemlərin Tədqiqi Assosiasiyası" (İPTA) İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Turizm sahəsində mövcud problemlərin aradan qaldırılması ilə bağlı görülən işlərə ictimai dəstəyin təşkili" adlı layihənin icrasına başlayıb.
Layihənin məqsədi Azərbaycanda turizm sahəsində mövcud problemlərin aradan qaldırılmasına dəstək verməkdir. Tədbir çərçivəsində Azərbaycan Turizm və Menecment Universitetinin fakültələri, turizmə aid kafedraları, Tələbə Elmi Cəmiyyəti, Gənclər Təşkilatı ilə birlikdə 8 seminar və rəy sorğusu keçirilməsi planlaşdırılır.
Assosiasiya ilk tədbirlərini Azərbaycan Turizm və Menecment Universitetinin (ATMU) "Biznes idarəçiliyi" və "Turizm və qonaqpərvərlik" fakültələrinin müəllim və tələbə kollektivi ilə keçirib.
Tədbirlərdə Assosiasiyanın sədri, t.ü.f.d., dosent Məhərrəm Zülfüqarlı, "Biznes idarəçiliyi" fakültəsinin dekan müavini Anar Mirzəyev, "Marketinq" kafedrasının müdiri, i.ü.f.d., dosent Anar Eminov, "Turizm və qonaqpərvərlik" fakültəsinin dekanı c.ü.f.d., dosent Rəhman Səfərov və turizm sahəsində çalışan digər mütəxəssislər çıxış edib. Məruzəçilər turizmlə bağlı beynəlxalq təcrübə barədə tədbir iştirakçılarına məlumat verərək, ölkədə turizm sahəsində mövcud problemlər və onların həlli yolları barədə fikirlərini açıqlayıb. Məruzələr ətrafında turizm ixtisasından dərs deyən müəllimlər, təhsil alan tələbələr turizm sahəsində mövcud olan problemlər barədə öz fikirlərini bildirib. Bundan əlavə, tədbir iştirakçıları arasında problemlə bağlı rəy sorğusu keçirilib.
Növbəti tədbirlərin Azərbaycan Turizm və Menecment Universitetinin "Xidmət mühəndisliyi" fakültəsində keçirilməsi planlaşdırılır.
Məlumat "Bakı-Xəbər"ə "İctimai Problemlərin Tədqiqi Assosiasiyası" (İPTA) İctimai Birliyinin mətbuat xidmətindən daxil olub.
