Çingiz İsmayılov: "Həm təcrübə, həm mühafizəyə yönəlmiş maliyyə vəsaitlərinin səmərəli istifadəsi, həm də bu sahədə işlərin koordinasiyası baxımından nəzarətin bir quruma həvalə olunması daha münasibdir"
"Turizm obyektlərinə güclü nəzarət olmalı və bu nəzarəti bir qurum həyata keçirməlidir ki, keyfiyyətdə problem olmasın". Bu fikirlər Milli Məclisin Əmək və sosial siyasət komitəsinin iclasında "Turizm haqqında" yeni qanun layihəsinin müzakirəsi zamanı səsləndirilib. Qeyd edilib ki, turizm obyektləri üzərində bir neçə qurumun nəzarət funksiyasını yerinə yetirməsi fayda verməyəcək.
Maraqlıdır, turizm obyektlərinə nəzarət necə tətbiq olunmalıdır? Ümumiyyətlə, turizm obyektlərinə bir, yoxsa bir neçə dövlət qurumu nəzarət etməlidir?
Məsələ ilə bağlı fikir bildirən turizm sahəsi üzrə ekspert Çingiz İsmayılov "Bakı-Xəbər"ə açıqlamasında qeyd etdi ki, turizm obyektlərinin qorunmasına ixtisaslaşmış bir qurum nəzarət etməlidir: "Həm təcrübə, həm mühafizəyə yönəlmiş maliyyə vəsaitlərinin səmərəli istifadəsi, həm də bu sahədə işlərin koordinasiyası baxımından nəzarətin bir quruma həvalə olunması daha münasibdir. Yoxsa, pərakəndə şəkildə kiçik şirkətlərin bu işlə məşğul olması düzgün deyil. Pərakəndə şəkildə olanda həmin şirkətlər heç məsuliyyət də daşımır. Ancaq dövlət qurumu bu işlə məşğul olarsa, bu işin arxasında məsuliyyətlə dayanar. Bəllidir ki, məsuliyyət olan yerdə güvən də olur".
Həmsöhbətimizin sözlərinə görə, turizm obyektlərinə nəzarət bir quruma həvalə olunarsa, o qurumun işçiləri müvafiq bilik və təcrübəyə malik olacaq: "Hesab edirəm ki, mühafizə məsələsi bir quruma həvalə olunmalıdır ki, keyfiyyətdə problem yaşanmasın".
Ç.İsmayılov onu da vurğuladı ki, turizm obyektlərinə nəzarətin hansı qurum tərəfindən həyata keçirilməsi seçimi düzgün olmalıdır: "O qurumda çalışacaq şəxslər öz ixtisasının peşəkarı olmalıdır. Turizm obyektləri sənaye müəssisəsi deyil ki, hər işə ehtiyacı olan şəxs mühafizədə çalışsın. Bu işə yalnız mütəxəssislər cəlb olunmalıdır. Dövlət əhəmiyyətli obyektlər kimi, turizm obyektlərinə də ciddi nəzarət olmalıdır".
Günel CƏLİLOVA
