Məhərrəm Zülfüqarlı: "Turizm obyektlərinə müdaxilələrə yol verilməməlidir və bununla bağlı yeniliklər qanunda öz əksini tapsa yaxşı olar"
Yeni turizm mövsümü başlayır. Demək olar ki, artıq ölkənin bir çox bölgələrində istirahət mərkəzləri qapılarını qonaqlarının üzünə açıb. Bakıda və digər turist zonalarında yüksək xidmət səviyyəsinə malik mehmanxanaların sayı artdığı üçün, bu, ölkəyə turist axınına şərait yaradır. Hazırda ölkədə 550-yə yaxın otel var.
Bu arada Milli Məclisin Əmək və sosial siyasət komitəsinin iclası keçirilib. İclasda "Turizm haqqında" qanun layihəsi ikinci oxunuşda müzakirə edilib.
Parlamentin Sosial qanunvericilik şöbəsinin bölmə müdiri Adil Vəliyev bildirib ki, qanun layihəsində ən böyük problemlərdən biri rekreasiya zonalarında tikintiyə icazə ilə bağlıdır. O qeyd edib ki, layihədəki bəzi maddələr açıq qalıb: "Ən böyük problemlərdən biri rekreasiya zonalarında tikintiyə icazənin verilməsidir. Həmin yerlərdə tikintiyə icazənin nəzarət orqanı tərəfindən verilməsi mübahisə predmetidir. Bununla bağlı biz Mədəniyyət və Turizm Nazirliyi ilə razılığa gəlib müəyyənləşdirməliyik ki, sahibkarlar üçün əlavə problemlər yaranmasın, icazənin özü üçün əlavə "icazə" sənədi olmasın".
Qeyd edək ki, Azərbaycanda "Turizm haqqında" hazırkı Qanun 1999-cu ildə qəbul olunub. Deputat Hadı Rəcəblinin sözlərinə görə, "Turizm haqqında" Qanunun qəbulundan 17 il keçdiyindən, müasir standartlara cavab vermir. Ona görə də bir sıra yeniliklərin edilməsi zəruridir. O baxımdan, "Turizm haqqında" hazırkı Qanunda ziyanlı və dəyişilməsi vacib məqamlar hansılardır? Sözügedən məsələ ilə bağlı "Bakı-Xəbər"ə açıqlama verən ekspert Məhərrəm Zülfüqarlının sözlərinə görə, bir sıra məqamlar var ki, qanunda onların dəyişdirilməsi zəruridir: "Xüsusən də gələn turistlər üçün vizaların sadələşdirilməsi vacibdir. Nəzərə almaq lazımdır ki, Türkiyə və İranla bizim aramızda viza rejimi qalmaqdadır. Ancaq sözügedən dövlətlər Azərbaycanla münasibətlərində bunu ləğv ediblər. Hesab edirəm ki, bu məqamın xüsusi olaraq nəzərə alınmasına ehtiyac var. Bundan başqa, turizm obyektlərinə müdaxilələrə yol verilməməlidir. Sözügedən məsələ ilə bağlı yeniliklər qanunda öz əksini tapsa yaxşı olar. Digər tərəfdən, qiymət məsələsində elə etmək lazımdır ki, turistlər narazı qalmasın. Bəzən dövlət turizmin inkişafı naminə dotasiya verir. Elə etmək lazımdır ki, bu vəsait təyinatı üzrə xərclənsin. Turizm marşrutlarını genişləndirmək lazımdır və bununla bağlı məsələlər qanunda öz əksini tapsa yaxşı olar. Turizm abidələri tapılıb marşrutlara daxil edilməlidir. Hesab edirəm ki, bütün bunlar qanunvericilikdə öz əksini tapmalıdır".
Vidadi ORDAHALLI
