Ruslan Quliyev: "Bakı İslam Həmrəyliyi Oyunlarını izləmək üçün gələn turistlər fürsətdən istifadə edib bölgələrimizə də gedir"
IV İslam Həmrəyliyi Oyunları ilə əlaqədar Azərbaycana minlərlə xarici turist gəlib. Xarici turistlər IV İslam Həmrəyliyi Oyunlarını izləməklə yanaşı, bölgələrimizi də ziyarət edir. Açıqlanan məlumatlara görə, turistlər Şəki, İsmayıllının Lahıc qəsəbəsi, Naftalan şəhəri, şimal bölgəsinə daha çox maraq göstərir.
Tarixi-mədəniyyət abidələri ilə yanaşı, mətbəxi ilə də dünyada tanınan Şəkiyə gələn turistlərin sayında xeyli artım müşahidə olunur. Qeyd edək ki, turistlərin İslamiadanı izləməsi üçün "Yuxarı Baş" Dövlət Tarix-Memarlıq Qoruğu ərazisində lazımi şərait yaradılıb.
Misgərlik sənətinin mərkəzi olan İsmayıllının Lahıc qəsəbəsi də turistlərin ən çox axın etdiyi yerlərdəndir.
Dolanbac yolları, döşəmə daşları ilə tarixi özündə əks etdirən Lahıc turistlərin diqqət mərkəzindədir. Qəsəbəyə gələn turistlərin ən çox diqqətini çəkən isə buradakı qədim tikililər, tarixi abidələrdir. Lahıca gələn turistlər buradan əliboş geri dönmür. Suvenirlər və burada hazırlanan milli geyimlər qonaqlar tərəfindən əç çox alınan əl işləri sırasındadır.
Turizm sahəsi üzrə ekspert Ruslan Quliyev "Bakı-Xəbər"ə açıqlamasında qeyd etdi ki, "Bakı-2015" İlk Avropa Oyunlarında olduğu kimi, İslam Həmrəyliyi Oyunları da Azərbaycan turizminin maksimum səviyyədə sərgilənməsinə böyük şərait yaradır. Bu cür beynəlxalq əhəmiyyətli idman tədbirlərinin keçirilməsi ölkə iqtisadiyyatı üçün önəmlidir: "Bəlli olduğu kimi, xarici ölkələrin televiziya kanallarında İclam Həmrəyliyi Oyunları çarxlarının nümayiş olunması milyardlarla insanın Azərbaycana marağını artırır". Həmsöhbətimizin sözlərinə görə, hazırkı vəziyyətdə turizmin inkişafı üçün bölgələr üzrə marşrut xəttinin tətbiqi və təbliği önəmlidir: "Bakı İslam Həmrəyliyi Oyunlarını izləmək üçün gələn turistlər fürsətdən istifadə edib bölgələrimizə də gedir. Turistlər əsasən Qəbələ, Quba-Xaçmaz, Şəki-Zaqatala və digər istiqamətlər üzrə səfər edir. Bu günlərdə ölkəmizə gələn turistlər bölgələrə əsasən 1 və ya 2 günlük səfər edir. Güman edirəm ki, İslam Həmrəyliyi Oyunlarından sonra ölkəmizə gələn turistlərin sayı artacaq".
Günel CƏLİLOVA
