Müzəffər Ağakərimov: "Səyahəti sevənlər Azərbaycanın gözəl təbiətini görmək üçün bura gəlməyə üstünlük verir"
Bahadur Bilalov: "Vizaların verilmə qaydasının sadələşdirilməsi turistlərin Azərbaycana marağını artırır"
Mayın 10-dan etibarən Azərbaycan IV İslam Həmrəyliyi Oyunlarına ev sahibliyi edir. Beynəlxalq əhəmiyyətli yarışı izləmək üçün ölkəmizə çoxlu sayda turist gəlib.
Qeyd edək ki, son illər səyahəti sevənlərin üz tutduqları ölkələr arasında Azərbaycan da üstünlük təşkil edir.
Açıqlanan məlumatlara əsasən, ölkəmizə əsasən Türkiyə, Çin, Rusiya və ərəb ölkələrindən gələnlərin sayında artım müşahidə olunur.
Məlumat üçün bildirək ki, hələ ötən ilin yayında turizm sahəsi üzrə ekspertlər mediaya verdikləri açıqlamada qeyd ediblər ki, qış aylarında Azərbaycana gələn turistlərin sayında artım qeydə alınacaq. Bu proqnozlar özünü doğrultdu. Bu il "Şahdağ" Turizm Mərkəzinə rekord sayda turist axını qeydə alındı. 15 dekabr tarixindən, bayram günləri də daxil olmaqla, "Şahdağ"ı ziyarət edənlərin sayı 35 min nəfərdən çox olub. Orada təkcə 2 yanvar tarixi üçün 6 min nəfərdən çox turist qeydə alınıb.
"Tufandağ" Qış-Yay Turizm İstirahət Kompleksi də ondan geri qalmadı. Yalnız yanvarın 1-dən 5-dək bu istirahət kompleksinə 15 mindən çox turist gəlib.
İstər ölkənin qış turizmi üçün əlverişli bölgələri, istərsə də paytaxtda ərəb ölkələri, eləcə də digər ölkələrdən gələn turistlərin sayında artım müşahidə etmək olardı.
Azərbaycana gələn turistlərin sayında artım səbəbsiz deyil. Bunu illərdir həyata keçirilən tədbirlərin nəticəsi kimi də dəyərləndirmək olar.
Azərbaycan Turizm Assosiasiyası sədrinin müşaviri Müzəffər Ağakərimovun sözlərinə görə, Rusiya, Belarus, Ukrayna turistləri Xəzər dənizi və Azərbaycanın gözəl təbiətini görmək üçün bura gəlməyə üstünlük verir: "Amma bu da danılmaz faktdır ki, rus turistlər əvvəllər Türkiyəyə daha çox gedirdi. Çünki orada Antalya, Bodrum, Quş adası kimi yerlərdə çimərlik turizmi yetərincə inkişaf edib. Bunun üçün də onların Türkiyəyə marağı çox olur. Təbii ki, Azərbaycana da rus turistləri gəlir. Amma bunun davamlı olması, eləcə də daha çox turist cəlb edilməsi üçün çimərlik turizmini inkişaf etdirməli, regionlarımızdakı infrastrukturu yaxşılaşdırmalıyıq. Bundan əlavə, öz infrastrukturumuzu, turizm potensialımızı Rusiya bazarında da təbliğ etməliyik. Mədəniyyət və Turizm Nazirliyinin və Azərbaycan Turizm Assosiasiyasının birgə işi nəticəsində Moskva şəhərində bizim nümayəndəliyimiz açılıb. Həmin nümayəndəlik orada təbliğat işi ilə məşğul olur və rus turistlərinin daha çox gəlməsi üçün şərait yaradılır. Bundan başqa, müxtəlif milli yeməklər, milli çay dəsgahı, milli musiqilər səslənən əyləncəli məkanlar rus turistləri üçün maraqlı olur. Həmçinin Bakı şəhəri ilə kifayətlənməyib, ölkənin başqa regionlarına da səfərlər təşkil olunmalıdır. Bu zaman onların marağını cəlb etmək daha asan olar".
Turizm sahəsi üzrə ekspert Bahadur Bilalov bizimlə söhbətində qeyd etdi ki, ölkədə keçirilən beynəlxalq əhəmiyyətli yarışlar Azərbaycan turizminin inkişafına səbəb olur: "Bu yarışlar sayəsində xarici ölkələrdən çoxlu sayda turist gəlir. Azərbaycana Rusiya, Türkiyə, Çin və ərəb ölkələrindən gələn turistlərin sayının üstünlük təşkil etməsinin müxtəlif səbəbləri var. Bəllidir ki, ruslar və türklər daim ölkəmizə səfər edir".
Həmsöhbətimiz onu da bildirdi ki, Azərbaycanda turizmin inkişafının əsas səbəblərindən biri də ölkəmizdə hökm sürən sabitlikdir: "Ölkə başçısı İlham Əliyev bu barədə öz çıxışında qeyd edib ki, indi turistlər risqli yerlərə getmək istəmirlər. Bilirlər ki, Azərbaycanda onların təhlükəsizliyi qorunacaq. Onlara məlumdur ki, Azərbaycan sabit ölkədir. Doğrudan da belədir. İndi ölkəmizə gələn turistlər rahat şəkildə bütün bölgələrə səyahət edə bilir.
Həmçinin, əvvəllər turistlərin gəlişi zamanı sənədləşmə ilə bağlı müəyyən problemlər yaranırdı. Artıq bu məsələ də öz həllini tapıb. Xüsusilə vizaların verilməsi xeyli asanlaşdırılıb".
Günel CƏLİLOVA
