Könül Vaqifqızı: "Bəzən ailədaxili münaqişələr, maddi problemlər, spirtli içkilərə aludəçiliyin təsiri ilə ailədə sıxıntılar müşahidə olunur"
Bu gün cəmiyyətimizdə aktual məsələyə çevrilən problemlərdən biri də boşanmalardır. Çünki son illər boşanmaların sayı aybaay artır. Statistik rəqəmlər də boşanmaların artdığını təsdiq edir. Hələ rəsmi nikahda olmayıb ayrılan cütlüklərin sayı isə bəlli deyil. Boşanmaların artmasına müxtəlif amillər təsir göstərir. Sosial-iqtisadi çətinlik, zorakılıq, sonsuzluq, tərəflərin bir-birini başa düşməməsi və digər səbəblər göstərilir.
Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov mediaya açıqlamasında bildirib ki, bu gün Azərbaycanda boşanmaların əsas səbəbi ailədaxili məişət zorakılığı hallarının çox olmasıdır: "Ailələrdə qadınlar zorakılıq hallarına dözmək istəmir və öz hüquqlarından istifadə edir. Ailədə iqtisadi vəziyyətin dəyişməsi də boşanmaya səbəb ola bilir. Hətta ailə üzvlərindən birinin işini itirməsi də birbaşa ailəyə təsir göstərir".
Ekspertlərin də fikrincə, boşanmaların artmasının əsas səbəblərindən biri məhz ailədaxili məişət zorakılığının artmasıdır. Psixoloq Könül Vaqifqızı "Bakı-Xəbər"ə açıqlamasında qeyd etdi ki, boşanmanın səbəbi arvadın və yaxud ərin pis olması, yola getməməsi, xarakterlərinin uyğun gəlməməsi deyil, məsuliyyət daşıya bilməməsidir: "Cütlüklər daşıdığı yükün ciddiliyinin fərqinə varmayıb ailə qurur və sonda ailələrdə anlaşılmazlıq yaranır. Bu anlaşılmazlığın sonu ailədaxili zorakılıqla bitir. Həmçinin, onu da deyim ki, uşaqlı ailənin məsuliyyəti də çox olur. Uşaqların dünyaya gəlməsi, onları yedizdirmək, geyindirmək, onlara öz xarakterinə uyğun tərbiyə vermək üçün çox zəhmət çəkmək tələb olunur. Tərəflər yeni öhdəlikləri ilə bacara bilmədiklərini gördükdə boşanmağı yeganə çıxış yolu kimi görür. Amma istəsələr, bacara bilərlər. Təəssüf ki, onların formalaşmasının əsasında "uşaqların, həyat yoldaşımın məsuliyyətini çəkməliyəm" fikri yoxdur. Məsuliyyət hissi olmadığı üçün əksər uşaqlı ailələr boşanır".
Həmsöhbətimizin sözlərinə görə, heç bir nikah boşanmaq məqsədilə qurulmur: "Qadın və ya kişinin ailə qurarkən əsas məqsədi xoşbəxt olmaqdır. Amma bəzən ailədaxili münaqişələr, maddi problemlər, spirtli içkilərə aludəçiliyin təsiri ilə ailədə sıxıntılar müşahidə olunur və boşanmaya gətirib çıxarır. Əvvəllər boşanma cəmiyyətimizdə çox pis qarşılanırdısa, hazırda buna münasibət bir qədər dəyişib. Boşanma hadisələri ilə bağlı insanlar arasında fərqli düşüncələr müşahidə olunur. Bəzi insanlar boşanma hadisəsini çox normal qarşılasa da, bəziləri buna yaxşı baxmır. Boşanmanın səbəblərindən biri nikahdan qabaq tərəfdaşların hər birinin öz partnyoru qarşısında, bilərəkdən və ya bilməyərəkdən, özünün ən yaxşı mənini seçilmiş şəkildə nümayiş etdirməsidir. Nikahdan sonra onların hər birinin əsl məni üzə çıxır. O zaman onlar şok yaşayır. Bu da münasibətlərin pozulması ilə nəticələnir".
Günel CƏLİLOVA
