Eyyub Hüseynov: "Uşaq qidaları məhsullarının distribütorları pediatrlarla heç bir stimullaşdırıcı görüş və tədbirlər keçirməməlidir"
Aynur Əliyeva: "Uşaq qidalarının satışı ilə məşğul olan distribütorlar pediatrlarla əməkdaşlıq edir"
Yeni doğulan insan - körpə kiçik bir ailənin, nəhayət, dövlətin inkişafı üçün potensial mənbə və onun gələcək qurucusudur. Sivil cəmiyyətin mühüm formalarından olan ailə və onun inkişafını möhkəmləndirən yeni nəslin yaranışı məhz körpələrin sağlam şəkildə formalaşmasından asılıdır. Yeni doğulan körpələrə ilkin təsirlər yaşadığı mühitin verdiyi mənəvi qida ilə yanaşı, onun yaşaması, böyüməsi üçün qəbul etdiyi qidalardan da birbaşa asılıdır. Yeni doğulan körpə üçün ən gözəl qida ana südüdür. Ancaq bu gün ana südünü əvəz edən müxtəlif adda qidalar reklam olunur. Reklam təkcə KİV üzərindən aparılmır. Xəstəxanalarda belə süni uşaq qidaları reklam olunur.
Respublikanın baş pediatrı Nəsib Quliyev bəzi doğum evlərinin süni qida məhsulları hazırlayan şirkətlərlə işbirliyi qurması barədə səslənən fikirlərə münasibət bildirərkən qeyd edib ki, qida şirkətlərinin doğuşayardım və ya uşaq müəssisəsinə hədiyyə olaraq hansısa süni qida qatışığı verməyə ixtiyarı yoxdur: "Bəzi halları biz də görürük, gücümüz çatan qədər qarşısını alırıq. Amma tək əldən səs çıxmaz. Biz çalışmalıyıq ki, uşaqların hüququ pozulmasın".
N.Quliyevin sözlərinə görə, doğum evlərində süni qida qatışığı satılması halları olmamalıdır: "Çox təəssüf ki, bu gün bunu özəl tibb müəssisələrində edirlər, dövlət tibb müəssisələrində belə hallar olmur. Bütün cəmiyyət bu prosesə etiraz etməli, hamının sözü eyni olmalıdır. Yalnız təkid etdikdən, əziyyət çəkdikdən sonra nəsə nəticə əldə etmək olar. Çünki qarşıda duran tərəf - qida satan adamlar, şirkətlər, təşkilatlar nə əyri işə desən əl atırlar, nə desən edirlər. Son zamanlar çalışırlar ki, bu işləri maskalanmış şəkildə etsinlər. Bazar münasibətləri qəddardır və burada çox çətinliklər var".
Məsələyə münasibət bildirən Azad İstehlakçılar Birliyinin sədri Eyyub Hüseynov qeyd etdi ki, uşaq qidaları məhsullarının distribütorları pediatrlarla heç bir stimullaşdırıcı görüş və tədbirlər keçirməməlidir:
"Onların pediatrlarla əlaqələri məhdudlaşdırılmalıdır. Azərbaycanda isə əksinədir. Bu distribütorlar həkimlərlə sıx işbirliyi qurub. Bizdə hətta rəsmi məlumatlar da var ki, belə şirkətlər pediatrları stimullaşdırmaq üçün onları müxtəlif xarici ölkələrdə keçirilən tədbirlərə də göndərir. Ümumiyyətlə, doğum evləri və uşaq xəstəxanalarında uşaq qidaları ilə bağlı heç bir təbliğat vasitələrindən istifadə edilməməlidir. Çünki tədqiqatlar göstərir ki, süni uşaq qidalarından xəbər tutan analar tənbəlləşir və onlardan istifadəyə meyl edir. Hətta bu zaman ananın südü çəkilir".
Pediatr Aynur Əliyeva bizimlə söhbətində bildirdi ki, uşaq qidalarının satışı ilə məşğul olan distribütorlar pediatrlarla əməkdaşlıq edir: "Pediatr uşağa süni qida verilməsini məsləhət görürsə, bu, həmin həkimin savadının aşağı olmasını göstərir. Uşağı müayinə edən pediatr analara ancaq onu tövsiyə etməlidir ki, ilk altı ayadək övladını yalnız ana südü ilə qidalandırsın. Altı aydan sonra isə, ana südü ilə yanaşı, əlavə qidalar da vermək olar. Bu qidalar isə yumurta sarısı, mannı və digər sıyıqlar ola bilər. Daha yaxşı olardı ki, bu qidalar da mağazalarda satılan hazır yox, ev şəraitində hazırlanan qidalar olsun. Ağıllı analar uşaqlarına konservantlarla konservləşdirilərək uzunmüddətli istifadəyə yararlı olan qablaşdırılmış uşaq yeməkləri vermir".
Pediatr onu da qeyd etdi ki, süni uşaq qidaları ixrac edən əsas ölkələrdən biri olan Almaniyada ana südü ilə qidalanan uşaqların sayı Azərbaycandakından çoxdur: "Onlar süni uşaq qidaları istehsal edib başqa ölkələrə satır. Özlərində isə bu qidalardan istifadə yox dərəcəsindədir. Deməli, belə ölkələr qazanc əldə etmək və məhsullarını satmaq üçün xam axtarır. İnsanlar ayıq olmalıdır, xüsusilə də analar. Buna qarşı, analarla yanaşı, bütün cəmiyyət mübarizə aparmalıdır. Təkcə həkimlərin deməyi bəs etmir".
Günel CƏLİLOVA
