Yadigar Məmmədli: "Onlar yeni yaşayış massivlərində çanaq antenalar qurub özləri yayımçılıqla məşğul olur"
"Kabel televiziyası sahəsində qanunsuz yayımla məşğul olanlar var. Onlara yayımçı da demək olmaz, sahibkarlar öz binalarının içərisində qanunsuz kabel şəbəkəsi yaradıb".
Bunu Milli Televiziya və Radio Şurasının sədri Nuşirəvan Məhərrəmli bildirib. N.Məhərrəmli deyib ki, belə hallar kütləvi xarakter alıb: "Ona görə də tək Milli Televiziya və Radio Şurası yox, digər qurumlarla birlikdə bu problemi həll etmək lazımdır. "Kabel televiziyası haqqında" qanun qəbul olunandan sonra bu sahədə tədbirlər də sərtləşəcək. Qanun layihəsi mayın 16-da Milli Məclisdə müzakirəyə çıxarılacaq. Söhbət ilk növbədə cərimələrin tətbiqindən gedir. Qanunsuz sahibkarlıq fəaliyyətinə qarşı mübarizə çərçivəsində tədbirlər görüləcək".
N.Məhərrəmli medianın kütləvi sənət kimi çoxlu problem yaratdığını da qeyd edib: "Xüsusən də internet texnologiyaları ilə bağlı bunu qeyd etmək lazımdır. Media sahəsində kütləvilik olduğu üçün, həmişə problemlər olacaq".
Həqiqətən də reallıq ondan ibarətdir ki, çoxmərtəbəli binaların əksəriyyətində qanunsuz kabel yayımı ilə məşğul olan şəxslər var. Belə hallar xeyli saydadır. Dəfələrlə bu məsələ qaldırılsa da, müəyyən xəbərdarlıqlar edilsə də, bina sahibləri buna əməl etmir. O üzdən, belə hallara qarşı qanun çərçivəsində daha konkret addımlar atılmalıdır. Bu məsələdə hansı qurumlar MTRŞ-yə kömək edə bilər? Məsələyə münasibət bildirən media eksperti Yadigar Məmmədlinin sözlərinə görə, dünyanın bir sıra ölkələrində kabel televiziyası inkişaf edib və bəziləri artıq ömrünü başa vurub: "Son illər internet televiziyası kabel televiziyasını geridə qoyub. Buna baxmayaraq, bu məsələnin parlamentdə müzakirə olunmasında məqsəd ondan ibarətdir ki, ölkədə bu sahədə bir səliqə-sahman yaradılsın, yayımçılıqla məşğul olan çoxsaylı şirkət qanuna tabe olsun. Çünki onların əksəriyyəti qanundankənar fəaliyyət göstərir. Onlar yeni yaşayış massivlərində çanaq antenalar qurub özləri yayımçılıqla məşğul olur. Elə telekanallar var ki, ölkəmizin informasiya təhlükəsizliyinə xələl gətirir. Digər tərəfdən, uşaqlarla bağlı bir sıra qadağan olunmuş kanallar var. Bu baxımdan, belə bir təşəbbüsün qaldırılması çox mütərəqqi addımdır. Ancaq bunun tənzimlənməsi, qanunsuz yayımların qarşısının alınması tək MTRŞ-nin üzərinə düşən məsələ deyil. Qurum kənardan nəzarəti həyata keçirir. Hesab edirəm ki, Vergilər Nazirliyi və digər qurumlar bu işdə kömək edə bilər. Ona görə də, müvafiq qurumlarla yanaşı, cəmiyyət də bu işdə MTRŞ-yə kömək etməlidir. Yəni bu tək bir qurumun yox, hamının işidir".
Vidadi ORDAHALLI
