Şahin Camalov: "Ölkədə həm qonaqların, həm də yerli vətəndaşların təhlükəsizliyinin təmin olunması üçün lazımi addımlar atılır"
İslam Həmrəyliyi Oyunlari zamanı hərəkətin təhlükəsizliyini 1200 yol polisi əməkdaşı təmin edəcək. Bakı Nəqliyyat Agentliyinin baş direktoru, IV İslam Həmrəyliyi Oyunları zamanı nəqliyyat sisteminin tənzimlənməsi və idarə olunması üzrə Koordinasiya Şurasının sədri Vüsal Kərimli və Daxili İşlər Nazirliyi Baş DYP İdarəsinin rəisi, polis general-mayoru Ramiz Zeynalov İslam Həmrəyliyi Oyunlarında iştirak edən atletlərin daşınması üçün ayrılan nəqliyyat vasitələrinin sürücüləri ilə görüşüblər. Polis general-mayoru R.Zeynalov Oyunların nəqliyyat əməliyyatlarına cəlb olunan sürücülərə yol hərəkəti qaydalarına ciddi əməl etmələri, eyni zamanda, onlara tapşırılan missiyanı yerinə yetirərkən əsl vətəndaşlıq mövqeyindən çıxış etmələri ilə bağlı tövsiyələrini verib. İdarə rəisi yol hərəkətinin təhlükəsizliyinin təmin edilməsində sürücülərin üzərinə daha böyük məsuliyyət düşdüyünü xatırladıb. Yol hərəkətinin təhlükəsizliyi və yüksək səviyyəli nümayəndə heyətlərinin müşayiəti üzrə qarşıda duran vəzifələr yol-patrul xidmətinin 1200 əməkdaşı tərəfindən xüsusi təyinatlı 400 avtomobillə təmin ediləcək.
"Təhlükəsiz Yol" Alyansının koordinatoru ŞaHin Camalov "Bakı-Xəbər"ə açıqlamasında qeyd etdi ki, ölkədə həm qonaqların, həm də yerli vətəndaşların təhlükəsizliyinin təmin olunması üçün lazımi addımlar atılır: "Bu işlər bütün il boyu edildiyi üçün, bu gün 1200 yol polisi əməkdaşının İslam Oyunları zamanı təhlükəsizliyi təmin etməsini növbəti uğurlu addım kimi dəyərləndirmək lazımdır. Mən deyərdim ki, ölkəmizdə əhalinin təhlükəsizliyi yüksək səviyyədə qorunur. Bu iş artıq oturuşmuş bir səviyyədədir".
Ş.Camalov onu da bildirdi ki, IV İslam Həmrəyliyi Oyunlarının təhlükəsizliyinin təmin olunmasına hüquq-mühafizə orqanlarının minlərlə işçisi cəlb olunur: "Yarışlar zamanı təhlükəsizliklə bağlı heç bir problem olmayacaq. Bu vəziyyət, həmçinin, Formula-1 yarışlarında da hiss olunacaq".
Günel CƏLİLOVA
