Daxili İşlər Nazirliyinin rəhbərliyi və şəxsi heyəti, eləcə də Daxili Qoşunların hərbi qulluqçuları Heydər Əliyevin anadan olmasının 94-cü ildönümü münasibətilə mayın 9-da Suraxanı rayonu ərazisindəki yaşıllıq massivində növbəti ağacəkmə kampaniyası keçirib.
DİN-in mətbuat xidmətindən baki-xeber.com-a bildirildiyinə görə, polis əməkdaşları və Daxili Qoşunların hərbi qulluqçuları hələ 2010-cu ildə sözügedən 5 hektarlıq sahədə Abşeron yarımadasının iqlim şəraitinə daha uyğun və dözümlü, dekorativ cəhətdən yaraşıqlı Eldar şamları və zeytun ağacları əkiblər. Dünənki tədbir zamanı isə ağaclara aqrotexniki qaydada qulluq göstərilib, ərazi alaq otlarından təmizlənərək budama və suvarma işləri aparılıb, ağacların küləkdən qorunması və normal böyümələri üçün qoruyucu dirəklər basdırılıb. Bundan əlavə, sözügedən sahədə abadlıq və təmizləmə işləri görülərək boş qalmış yerlərə əlavə olaraq 600 ədəd yeni Eldar şamının tingləri əkilib.
Daxili işlər orqanlarının əməkdaşları ətraf mühitin qorunması, ekoloji vəziyyətin daha da yaxşılaşdırılması məqsədi ilə bundan sonra da ağacların əkilməsi və onlara qulluq göstərilməsi işini davam etdirəcək.
