Əjdər Ağayev: "Dərslikdə nöqsan varsa, deməli, səhv kitab çap olunana kimi nəzarət edənlərin hamısının gözündən yayınıb və ya bu işə səthi yanaşılıb"
Məlumatlara görə, X sinif dərsliklərində səhv aşkar olunub. Dövlət İmtahan Mərkəzi (DİM) ilə Təhsil Nazirliyi arasında bağlanmış müqavilə əsasında DİM yeni təhsil proqramları (kurikulumlar) əsasında hazırlanmış X sinif dərslik komplekti layihələrinin qiymətləndirilməsini həyata keçirib.
Mərkəzin yaydığı məlumata əsasən, qiymətləndirmə nəticəsində hazırlanmış rəylər (945 vərəq) 25 yanvar 2017-ci il tarixində Təhsil Nazirliyinə göndərilib.
Təhsil Nazirliyi tərəfindən müsabiqə şərtini ödəmiş X sinif dərslik komplekti layihələri "ictimai müzakirə" üçün http://www.trims.edu.az saytına yerləşdirildikdən sonra nazirliyin rəsmi müraciətinə əsasən yenidən həmin layihələrin elmi-metodiki monitorinqi aparılıb.
Monitorinq zamanı müəyyən edilib ki, qiymətləndirmə nəticəsində hazırlanmış rəylərdə göstərilmiş qeyd, irad və təkliflərin xeyli hissəsi nəzərə alınıb, lakin bəzi iradlar olduğu kimi qalıb, əlavə və dəyişikliklər zamanı isə yeni səhvlərə yol verilib. Dərslik komplektlərinin yuxarıda qeyd olunan saytda yerləşdirilmiş layihələrinin monitorinqi nəticəsində hazırlanmış yekun rəylər (193 vərəq) 08 may 2017-ci il tarixində Təhsil Nazirliyinə göndərilib.
Təhsil sahəsi üzrə ekspert Əjdər Ağayev "Bakı-Xəbər"ə açıqlamasında qeyd etdi ki, hazırlanan dərsliklərə əvvəlcədən mütəxəssislər tərəfindən baxılır, qiymətləndirilir. Yüksək qiymət verilirsə, dərslik nəşriyyat tərəfindən çap olunur: "Doğrudan da dərslikdə nöqsan varsa, deməli, bu səhv kitab çap olunana kimi nəzarət edənlərin hamısının gözündən yayınıb və ya bu işə səthi yanaşılıb".
Həmsöhbətimiz hesab edir ki, dərsliklər bütünlüklə təkmilləşdirilməlidir: "Birinci sinifdən tutmuş, XI sinfə qədər bütün dərsliklər təkmilləşdirilməlidir. Dərsliklərə müasir dövr, müasir hadisələr daxil edilməlidir. Həmçinin, şagirdlərin yaşına uyğun olan mövzular seçilib hazırlanmalıdır".
Günel CƏLİLOVA
