Bahadur Bilalov: "Avropa sakinləri hazırda Azərbaycana məhz ekoturizm nöqteyi-nəzərindən maraq göstərir"
Müasir dövrdə turizm industriyasının inkişafı xeyli sürətlənib və bu sahə hazırda gəlir əldəetmə funksiyasına görə, faktiki olaraq, neft sənayesinə yeganə alternativ kimi qiymətləndirilir. Belə ki, hazırda dünyanın bir çox ölkələrinin iqtisadiyyatında mühüm rol oynayan, milyonlarla insanın məşğulluğunu təmin edən və təsərrüfatın digər sahələri ilə qarşılıqlı əlaqədə fəaliyyət göstərən, geniş maddi-texniki bazaya və infrastruktura malik olan, dayanıqlı iqtisadi inkişaf prinsiplərinə söykənən turizm sənayesi bəşəriyyət üçün daha firavan gələcək vəd edir.
Turizm dövlət büdcəsinin formalaşmasına, ticarət balansının sabitləşməsinə, işsizlik kimi ağır bir problemin həllinə kömək edir, bütövlükdə, ölkə iqtisadiyyatının inkişafının katalizatoru qismində çıxış edir. Bütün bu xüsusiyyətləri ilə yanaşı, turizm sənayesi eyni zamanda dünyada sülhün möhkəmləndirilməsi, xalqlar arasında mədəni əlaqələrin genişləndirilməsi, dünya ictimaiyyətinin yüksək insani dəyərlər ətrafında birləşməsi sahəsində də mühüm rola malikdir.
Ekoturizm sahəsi Azərbaycan üçün xüsusi bir əhəmiyyət daşıyır. Dünyanın istənilən nöqtəsində Qafqazdan, xüsusilə də Azərbaycandan söz düşəndə, ən çox danışılan mövzu onun təbiəti, yeraltı və yerüstü sərvətləri olur. Vətənimiz Qafqaz və Kiçik Asiya, Qara dəniz və Xəzər dənizi regionunda qədim mədəniyyətə, Avropada ən zəngin bioloji müxtəlifliyə malik olan ölkələrdən biri olaraq fövqəladə əhəmiyyətli təbii irsi ilə fərqlənir.
Açıqlanan statistik rəqəmlərə əsasən, Azərbaycana gələn ekoturistlərin sayı artıb.
Ekologiya və təbii sərvətlər naziri H.Bağırov "Heydər Əliyevin ideyaları və dərin islahatlar strategiyası" adlı kitabda dərc olunan yazısında bildirir ki, milli parklarda xidmət infrastrukturunun yaradılması sayəsində ekoturistlərin sayı kəskin artıb. O qeyd edib ki, hazırda ümumi sahəsi 893 min hektar olan xüsusi mühafizə edilən təbiət əraziləri, 9 milli park, 11 dövlət təbiət qoruğu fəaliyyət göstərir: "Göygöl Milli Parkında əhalinin müxtəlif təbəqələri üçün müasir tələblərə cavab verən otel kompleksi istifadəyə verilib. Bunun sayəsində təkcə 2015-2016-cı illərdə Göygöl Milli Parkını 265 min turist ziyarət edib".
Turizm sahəsi üzrə ekspert Bahadur Bilalov qeyd etdi ki, Azərbaycan Qafqaz regionunda ən zəngin təbii sərvətlərə malik ölkədir: "Azərbaycan ərazisində 9 iqlim zonası üzrə 4500 növə kimi bitkilər qeydə alınıb ki, bu da Qafqazın növ tərkibinin 64 faizini, keçmiş ittifaqın bütün florasının 24 faizini təşkil edir. Azərbaycan ərazisində üç unikal dağ silsiləsi, mineral bulaqlar və relikt meşələr var ki, bunlar ölkəmizi ekoloji turizm cəhətdən cəlbedici edir. Avropa sakinləri hazırda Azərbaycana məhz ekoturizm nöqteyi-nəzərindən maraq göstərir".
Həmsöhbətimizin sözlərinə görə, əvvəllər turizm deyəndə təsəvvürə ilk olaraq dəniz, qum, çimərlik və günəş, sonra isə kondisionerli otaq gəlirdi: "Lakin son illər xarici turistlər ucqar, mənzərəli, təkrarı olmayan yerlərə səyahət etmək, meşələrdə gecələmək, quşların səsini eşitmək, dağlara çıxmaq, təbii bulaqlardan su içmək, bir sözlə, təbiətin qoynunda dincəlmək, ocaq üstə bişən təamlardan dadmaq istəyir. Ona görə də turizmin bu növü artıq dünyanın diqqət mərkəzindədir, ekoloji və iqtisadi baxımdan sərfəli, macəra axtaranlar üçün də maraqlı istirahət növüdür".
Günel CƏLİLOVA
