Tahir Əmiraslanov: "Elmi cəhətdən dolmanın Azərbaycan yeməyi olmasını ermənilərə sübut etmişik"
Mehman Hüseynov: "Ermənilər bizim təamlardan bişirməyə çalışır, lakin onların əlinin nə səliqəsi var, nə də duzu"
Ermənilərin zaman-zaman, xüsusən Azərbaycana aid mahnılardan, musiqi alətlərindən tutmuş, mətbəx nümunələrinə kimi bir çox nəsnələri öz adlarına çıxması təzə söhbət deyil və Azərbaycan hər dəfəsində onların əsassız iddialarının cavabını verməyi bacarıb. Bu dəfə isə onlar mənimsəmək istədikləri nemətlərin "köklərinin daha dərində" olduğunu sübut etmək üçün əsrlər əvvələ baş vuraraq, ermənilərin XVII-XIX əsrlərdə Səlcuq türklərinə mətbəx mədəniyyəti öyrətdiyini iddia edib, hətta bununla bağlı kitab da yazıblar.
Azərbaycan süfrəsinin bəzəyi olan dolma ilə bağlı erməni iddiaları yeni deyil. Amma bu dəfə bu təamı öz adlarına çıxmaq üçün tarixin dərinliklərinə baş vurmaları maraq doğurur. Hətta ermənilər dolmanın türk mətbəxinə aid edilməsinin "səhv" olduğunu sübut etmək üçün 2011-ci ildən hər il ölkədə dolma festivalı da keçirir. Növbəti qondarma dolma festivalı isə mayın 20-dən keçiriləcək.
Festivalın məqsədi dünyaya dolmanın "ermənilərə məxsus" olduğunu göstərməkdir.
Milli Kulinariya Mərkəzinin rəhbəri Tahir Əmiraslanov qeyd etdi ki, hazırda 1918-ci ildən bu günə kimi olan məlumatlar toplanır: "Elmi cəhətdən dolmanın Azərbaycana məxsus olmasını dəfələrlə sübut etsək də, təbliğat baxımından ermənilər önə keçib. Bunun səbəblərini iş adamları və biznesmenlərdən soruşmaq lazımdır. Əslində, elmi cəhətdən dolmanın Azərbaycan yeməyi olmasını sübut etmişik. Amma təbliğat baxımından hələ ki, ermənilərə uduzuruq. İlk olaraq festivallar keçirilməli, bunun üçün maliyyə ayrılmalıdır. Bundan başqa, dolmanın Azərbaycana məxsus olmasını göstərmək üçün ölkəmizə UNESCO-dan qonaqlar gətirmək lazımdır".
Tanınmış aşpaz, kulinar Mehman Hüseynov bizimlə söhbətində bildirdi ki, ermənilər tək dolmanı deyil, Azərbaycan mətbəxinə aid olan bir çox təamı öz adına çıxmaq istəyir: "Biz tez-tez beynəlxalq müsabiqələrə qatılırıq. Həmin müsabiqələrdə zəngin Azərbaycan mətbəxinin təamlarını hazırlayıb münsiflərin qarşısına çıxarırıq. O müsabiqələrdə ermənilər də iştirak edir. Ermənilər bizim mətbəxin vurğunu olub. Onlar bizim təamlardan bişirməyə çalışıb, lakin onların əlinin nə səliqəsi var, nə duzu. Mən sizə deyim ki, 2005-ci ildə Moskvada aşpazlar arasında yarış keçirildi. Həmin yarışda erməni aşpazı da iştirak edirdi. Erməni aşpaz yarpaq dolmasının onların qədim yeməyi olduğunu dedi. Lakin mən ona sübut etdim ki, bu xörək qədim Azərbaycan yeməyidir. Yarış zamanı mən və erməni aşpazı yarpaq dolması bişirdik. Mənim hazırladığım dolma müsabiqədə iştirak edən hər kəs tərəfindən bəyənildi və erməniyə qalib gəldim. Erməni aşpazının hazırladığı dolmanın bükülməsi çox səliqəsiz və bərk idi. Orada iştirak edən şəxslərin heç biri erməni aşpazının hazırladığı dolmanı bəyənmədi. Həmin yarışda iştirak edən xarici dövlətlərin nümayəndələri dolmanın Azərbaycana aid olduğunu bir daha anladılar. Onlar nə qədər festival keçirsə də, nəticə göz qabağındadır".
Günel CƏLİLOVA
rlikdə Azərbaycanda rəqabətə davamlı, keyfiyyətə söykənən yüngül sənaye kompleksi yaradaq". Vidadi ORDAHALLI
