İlham Quliyev: "Dedi-qodulara əsaslanan, mənbəyi olmayan kriminal xəbərləri tirajlamaq düzgün deyil"
Şakir Ağayev: "Cinayət xəbəri şouya çevrilməməlidir"
"Media orqanları baş verən ailə-məişət zəminində törədilmiş cinayətləri geniş şəkildə, şou yaratmaqla işıqlandırır". Bunu Daxili İşlər Nazirliyinin Baş İctimai Təhlükəsizlik İdarəsinin xüsusilə mühüm tapşırıqlar üzrə baş inspektoru Əkbər Əkbərov Bakıda "Gender problemləri və media" mövzusunda keçirilən seminarda deyib.
O qeyd edib ki, "üzərində 12 bıçaq zərbəsi", "paltarı cırılmışdı" və sair kimi məqamları media orqanları göstərməklə şou yaradır və bu hallar da məişət zorakılığının təbliğinə xidmət edir.
Ə.Əkbərov bildirib ki, jurnalistlər ailədaxili münaqişələrin işıqlandırılması zamanı konfedensiallığı qorumalıdır. Onun sözlərinə görə, bəzi media orqanlarında bu cür münaqişələrin işıqlandırılmasında problemlər var: "Ailədaxili münaqişələrin gizli məqamlarının işıqlandırılması yolverilməzdir. Biz müsbət obrazları işıqlandırmalıyıq. Cəmiyyətdə mənfi rəyə köklənməməliyik. Ölkədə 300-dən artıq internet-media resursu fəaliyyət göstərir. İnterenet media inkişaf etdikcə, həm də problemlər yaranır. Bəzi xəbər saytları neqativ xəbərlərə üstünlük verməklə, mənfi rəy formalaşdırmağa çalışır. Bu kimi halların qarşısını almaq üçün bizim medianın dəstəyinə ehtiyacımız var. Baş vermiş zorakılıq hadisələri ilə əlaqədar daxili işlər orqanlarında mətbuat xidməti hadisələr haqqında çox qısa məlumat verir. Media orqanları isə bu hadisələri tam təfərrüatı ilə, geniş şəkildə işıqlanadırmaqla, məişət zorakılığının təbliğinə xidmət edir".
Məsələyə münasibət bildirən media kapitanlarının reaksiyası fərqli oldu.
"Kaspi" qəzetinin baş redaktoru İlham Quliyev "Bakı-Xəbər"ə açıqlamasında bunları qeyd etdi: "Əkbər müəllim, təbii ki, məsələyə DİN rəsmisi kimi yanaşır. Şübhəsiz ki, onlar istəyir ki, kriminal xəbərlər günün əsas müzakirə mövzusu olmasın. Bir vətəndaş kimi mən də bunu arzulayıram. Elə etmək lazımdır ki, gündəmdə kriminal xəbərlər olmasın. Amma xəbər varsa, mətbuat da onu işıqlandırmalıdır. O cümlədən də kriminal xəbərləri".
Həmsöhbətimizin sözlərinə görə, hazırkı dövrün oxucusu kriminal xəbərlərə böyük maraq göstərir: "Diqqət etsək, əksər saytlarda ən çox oxunan xəbərlər sırasında kriminal xəbərlər mütləq yer alır.
"Kaspi" qəzetində də kriminal xəbərlər səhifəsi var. Həftədə 2 dəfə günün kriminal xəbərlərinə yer veririk. Saytımızda da gün ərzində baş verən kriminal xəbərlərə yer ayırırıq. Hadisə olubsa, DİN özü məlumat yayıbsa, bizim onu verməməyimiz mümkün deyil. Amma bizim dedi-qodulara əsaslanan, mənbəyi olmayan kriminal xəbərləri verməyimiz mümkün deyil.
Digər tərəfdən, mən deyərdim ki, əksər ciddi KİV-lər kriminal xəbərləri, qeyd edildiyi kimi, təmtəraqla vermir. Bu işlə bəzi yeni saytlar məşğul olur desək, səhv etmərik. Məsələn, bu günlərdə Şamaxıda 2-ci sinif şagirdi olan azyaşlının zorlanması ilə bağlı mənbəyi məlum olmayan bir xəbər yayıldı. Bu xəbər sosial şəbəkələrdə də xeyli müzakirə olundu. Sonradan məlum oldu ki, xəbər əslində ağ yalandır. Hesab edirəm ki, DİN kifayət qədər ciddi bir məsələ ilə bağlı bu qədər qeyri-ciddi münasibəti mütləq araşdırmalıdır. İlk növbədə bu xəbəri dövriyyəyə buraxanın kimliyi aydınlaşdırılmalı, haqqında qanunun imkan verdiyi ən sərt səviyyədə ölçü götürülməlidir. Bu həm də bizim media üçün bir siqnal olmalıdır. Ən azı iki mənbə tərəfindən təsdiqlənməyən bu tipli məlumatlar mətbuata yol tapmamalıdır. Heç olmasa, rəsmi münasibət öyrənilməyə çalışılmalıdır. Məncə, sosial şəbəkələrdə fəal olan jurnalist həmkarlar, ictimai fəallar da bu mövzularda ehtiyatlı olmalıdır. Xəbər təsdiqlənməyibsə, buna münasibət bildirmək, müzakirə açmaq lazım deyil".
"Novoye Vremya" qəzetinin baş redaktoru Şakir Ağayev bizimlə söhbətində qeyd etdi ki, cinayət xəbəri şouya çevrilməməlidir. Cinayəti şouya çevirmək düzgün deyil: "Hər səhər xəbər oxumaq üçün internet saytlara daxil olarkən yalnız zorakılıq, intihar kimi xəbərlərlə rastlaşırıq. Təbii ki, bu tip xəbərləri oxuyanda insan günə pozitiv köklənə bilmir".
Həmsöhbətimizin sözlərinə görə, cinayət xəbərlərinin dəqiqləşdirilmiş formada yazılması üçün ilk öncə Daxili İşlər Nazirliyi hadisənin başvermə səbəblərini araşdırıb mediaya geniş formada məlumat verməlidir: "Belə olan halda, media ordan-burdan eşitdiklərini yazmaz. Son zamanlar intihar hadisələrinin sayı artıb. İntihar və digər faciələrin qarşısını almaq məqsədilə maarifləndirici verilişlər yayımlanmalıdır. O cümlədən, ailə-məişət zorakılığının qarşısının alınması istiqamətində də müəyyən maarifləndirici işlər görmək lazımdır".
Günel CƏLİLOVA
