Kamran Əsədov: "Bəzi məktəblərdə hələ də oxuma və yazma bacarığına malik olmayan şagirdlər var, o təhsil müəssisələrində hər hansı bir rəqabət mühiti yoxdur"
"Azərbaycanda müəllim peşəsinə olan maraq və müəllim olmaq üçün müraciət edənlərin sayı artıb". Bu fikir Təhsil Nazirliyinin 2016-cı ilin hesabatına həsr olunan tədbirində səslənib.
Qeyd olunub ki, təhsil müəssisələrində idarəetmənin keyfiyyəti təhsil sahəsinin nailiyyətlərində çox mühüm rola malikdir: "İdarəetmədə təkmilləşmə yalnız kadr islahatları ilə məhdudlaşmamalıdır. Artıq bir neçə ildir ki, ali məktəblər yalnız akademik göstəricilər üzrə fəaliyyətlə deyil, onlara verilən səlahiyyət çərçivəsində bütün maliyyə-iqtisadi çətinliklərin həlli ilə də məşğuldur. Lakin tələblər dayanmadan artır. Biz təhsil müəssisələrimizdə orta və uzunmüddətli rəqabət qabiliyyəti formalaşdırmalıyıq".
Maraqlıdır, təhsil müəssisələrində rəqabət qabiliyyəti necə formalaşdırıla bilər?
Təhsil sahəsi üzrə ekspert Kamran Əsədov bildirdi ki, təhsil sahəsində müəyyən çatışmazlıqlar var: "Bu gün Azərbaycanda 4481 orta məktəb var. Birdən-birə köklü şəkildə bu məktəb rəhbərlərinin hamısını dəyişə bilmərik. Çünki bu, digər bir məsələni - sosial narazılıqları ortaya çıxara bilər. Əlbəttə, Dövlət İmtahan Mərkəzinin (DİM) nəticələri Təhsil Nazirliyinin nəticələri ilə bəzən üst-üstə düşmür və ziddiyyət təşkil edir".
Ekspertin sözlərinə görə, bəzi məktəblərdə hələ də oxuma və yazma bacarığına malik olmayan şagirdlər var. Həmin bu məktəblər isə uzun illər ərzində dövlət büdcəsindən maliyyələşən məktəblərdir: "Belə məktəblərdə son illər ərzində bir nəfər də olsun ali məktəbə qəbul olunan şagird yoxdur. Deməli, bu məktəblərdə hər hansı bir rəqabət mühiti yoxdur. Onlar, sadəcə olaraq, parta, müəllim və şagirdlərdən ibarət olan bir qurumdur. Halbuki, dövlət büdcəsindən külli miqdarda vəsait ay ərzində bu müəssisələrə daxil olur.
Rəqabətə davamlı kadr yetişdirmək üçün dövlətin standart meyarları var. Təəssüflər olsun ki, bu gün direktor vəzifəsinə uyğun gəlməyən şəxslər var. Birincisi, təhsili uyğun gəlmir, hansısa dinşünaslıq ixtisası olan şəxs direktor vəzifəsini yerinə yetirir. İlk növbədə belə direktorlar təhsil müəssisələrinə rəhbərlikdən uzaqlaşdırılmalıdır".
Günel CƏLİLOVA
