Rəsul Cahangirli: "Bakı sakinlərinin qonaqpərvər olması turistlərin diqqətindən yayınmır"
Xəbər verildiyi kimi, "TurStat" analitik agentliyi rusiyalı turistlər arasında may bayramı günlərində səyahət üçün ən populyar olan MDB şəhərlərini müəyyən edib. Reytinq otellərin onlayn bronlaşdırılması sisteminin məlumatlarının təhlili əsasında hazırlanıb. Bakı, Minsk, Tiflis, Astana və Almatı reytinqdə ilk beşlikdə qərarlaşıb.
"TurStat"ın məlumatına əsasən, rusiyalı turistlər Bakıya orta hesabla 3,5 günlük gəlir və otellərdə qalmağa görə sutkalıq 60 dollar ödəyir.
Müşahidələr göstərir ki, son illər Rusiya turistləri Azərbaycana daha çox gəlir. Ümumilikdə isə, son 1 ildə Azərbaycana turist axını bir neçə dəfə artıb və bu, ən çox müzakirə olunan mövzulardan birinə çevrilib. Rusiya turistlərinin Bakıya üz tutmasını müxtəlif faktorlarla əlaqələndirmək olar. İqtisadiyyatın, xüsusən pərakəndə ticarət sektorunun inkişafı turistləri Bakıya cəlb edir. Turist axınının artması brend geyim və aksesuar mağazalarında qiymətlərin Avropadakı səviyyəyə enməsinə səbəb olub. Çünki adətən turistlər alış-verişdən əvvəl qiymətləri müqayisə edir.
Bütün hallarda, ekspertlər Bakının Rusiya turistlərinin 5 sevimli şəhərindən biri olmasını nə ilə əlaqələndirir? Məsələyə münasibət bildirən ekspert Rəsul Cahangirli bunu bir sıra faktorlarla əlaqələndirdi: "Məsələ ondadır ki, rus turistləri Bakını Dubayla müqayisə edir. İki şəhər arasında müəyyən bənzərliklər rus turistlərini cəlb edir. Eyni zamanda, Bakı sakinlərinin qonaqpərvər olması turistlərin diqqətindən yayınmır. Başqa bir tərəfdən, nəzərə almaq lazımdır ki, Sovet İttifaqının dağılmasından uzun illər ötsə də, Azərbaycan rusiyalıların arzu edilən qonaq olduğu azsaylı qonşu ölkələrdən biridir. Hesab edirəm ki, bu amilin də Rusiya turistlərinin cəlb olunmasında xüsusi rolu var. Başqa bir tərəfdən, aprelin 10-dan mayın 10-dək keçirilən Bakı Şoppinq Festivalı çərçivəsində alış-veriş etmək sərfəlidir. Bir çox qabaqcıl dünya brendlərinin malları festival çərçivəsində nəinki sərfəli qiymətlərə təqdim edilir, hətta 100 manat və daha artıq ödədikdə ƏDV geri qaytarılır. Bu, əlbəttə ki, alış-verişi daha sərfəli edir. Bütün bunları nəzərə alaraq demək olar ki, indi şoppinq üçün ən uyğun vaxtdır. Havaların gözəl keçməsi də bu prosesə öz müsbət təsirini göstərir".
Vidadi ORDAHALLI
