Məlahət Mürşüdlü: "Bu gün ingilis dilinin tədrisinə daha çox önəm verilir, ancaq..."
"İbtidai təhsildə məntiqli düşüncə, ümumi savad və həyati vərdişlərin öyrədilməsi əsas məsələ olmalı, ana dili və riyaziyyatın tədrisinə önəm verilməlidir". Bunu təhsil naziri Mikayıl Cabbarov ümummilli lider Heydər Əliyevin anadan olmasının 94-cü ildönümü münasibətilə təşkil olunmuş "Ən yaxşı təqdimat" müsabiqəsi qaliblərinin mükafatlandırılması mərasimində çıxış edərkən deyib.
Nazir bildirib ki, fənn kurrikulumlarının valideynlər tərəfindən mənimsənilməsi üçün maarifləndirmə işi də gücləndirilməlidir: "Bu gün bizi düşündürməli olan əsas məsələ müasir kompetensiya, bilik və səriştələrin ümumi əsaslarla qurulmasıdır ki, müəllimlər və tələbələr növbəti onilliklərdə onlardan uğurla faydalana bilsin. Məktəb proqramları vaxtaşırı yenilənməli, şagirdlərə elmlərin əsasları dərindən öyrədilməli, məktəblərdə alınan biliklər həyatda tətbiq edilməlidir".
M.Cabbarov qeyd edib ki, xüsusi diqqət xarici dillərin tədrisinə yönəlməli, onlara ayrılan saatlar artırılmalıdır. Onun sözlərinə görə, qloballaşma şəraitində gənclərin bir neçə dili bilməsi əhəmiyyətlidir.
Ekspertlər də xarici dillərin tədrisinə diqqətin artırılmasının vacib olduğunu düşünür.
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, xarici dili öyrənmək üçün əsas məkan məktəb deyil: "Xarici dili öyrənmək zamanın tələbidir. Dünya təcrübəsi göstərir ki, dil bilgisi ünsiyyətin yaradılmasında, iqtisadi, siyasi, mədəni və digər sahələrdə önəmli rol oynayır. Bütün fənlərin tədris olunmasında orta məktəb əsas baza rolunu oynayır. Xarici dillər orta məktəblərdə öyrədilir. İlkin biliyi uşaqlar ilk olaraq orta məktəbdə mənimsəyir".
Xarici dil fənlərinin saatlarının artırılmasına gəlincə, həmsöhbətimiz qeyd etdi ki, bu, əcnəbi dil fənləri arasında ayrıseçkilik yaradacaq: "Bəllidir ki, bu gün ingilis dilinin tədrisinə daha çox önəm verilir. Ancaq koreya, çin, alman və digər xarici dilləri də öyrənmək üçün böyük tələb var. Bu səbəbdən də tədris planlarında ayrılmış dərs saatlarının miqdarı lazımınca deyil. Ona görə də dərs saatlarının artırılması vacibdir".
M.Mürşüdlünün sözlərinə görə, elə dünyəvi fənlər var ki, onların dərs saatlarının artırılması daha münasibdir. Ancaq bu, fənlərin dərs saatları hesabına olmamalıdır. Ekspert hesab edir ki, orta məktəblərdə xarici dil klublarının fəaliyyət göstərməsi lazımdır. Bununla bağlı müəyyən işlər görülməlidir.
Günel CƏLİLOVA
