Kamran Əsədov: "Biz xaricdən mütəxəssis dəvət etməklə milli dəyərlərə uyğun dərslik yazılması məsələsində problem yaşaya bilərik" Rafiq İsmayıl: "Xarici dil dərsliklərinin hazırlanmasına əcnəbi mütəxəssislərin cəlb olunması..."
Bəzi dərsliklərdə dəyişiklik ediləcək. İlk dəfə olaraq xarici dil tədrisində istifadə olunan dərsliklərin beynəlxalq mütəxəssislərin iştirakı ilə hazırlanması nəzərdə tutulur. Bu barədə Təhsil Nazirliyinin illik hesabatında çıxış edən nazir Mikayıl Cabbarov məlumat verib. Nazir təhsilin məzmununun təkmilləşdirilməsi məqsədilə xarici dillərin tədrisi üzrə bir sıra layihələrin hazırlandığını qeyd edib. O bu cür pilot layihələrin bir çox fənn dərsliklərində də tətbiq ediləcəyini bildirib.
Xarici dil dərsliklərinin xarici mütəxəssislər tərəfindən hazırlanması məsələsinə təhsil ekspertlərinin fikrini öyrəndik.
Təhsil eksperti Kamran Əsədov bildirdi ki, yerli müəlliflər tərəfindən yazılan dərsliklərdə şagirdlərin Azərbaycan xalqının milli-mənəvi dəyərləri ruhunda tərbiyə olunması əsas meyar kimi götürülür: "Amma xarici mütəxəssislərin bu ideyaları nə dərəcədə doğruldacağı şübhə doğurur. Bizim xarici dillər üzrə dərsliklərimiz dünya standartlarına uyğun yazılmayıb. Buna görə də Təhsil Nazirliyi məhz dünya standartlarına uyğun dərslik modelinin yaradılmasına çalışır. Ümumi təhsil sistemində dərslik siyasəti Azərbaycan hökumətinin strateji fəaliyyət dairəsinə daxil olan prioritet istiqamətlərdən biridir. Qanunvericiliyin tələbinə görə, Azərbaycan Respublikasında dərslik siyasətini Təhsil Nazirliyi yox, Azərbaycan Respublikasının Nazirlər Kabineti müəyyən edir. Bilirsiniz, dərslik siyasətinin məqsədi məktəbliləri müasir standartlara uyğun bilik, bacarıq və vərdişlərə yiyələnən, Vətəninə, xalqına, onun adət-ənənələrinə bələd olan, milli və ümumbəşəri dəyərlər zəminində formalaşan, fiziki və mənəvi cəhətdən sağlam, müstəqil həyata hazır və demokratik düşüncəli vətəndaşlar kimi yetişdirməkdir. Lakin biz xaricdən mütəxəssis dəvət etməklə milli dəyərlərə uyğun dərslik yazılması məsələsində problem yaşaya bilərik.
Son illər orta məktəblərdə istifadə olunan dərsliklərin kriteriyaları ciddi müzakirə mövzusudur. Əlbəttə, xarici dil dərsliyindən başlanan təcrübədən, prinsip etibarilə, o qədər də narahat olmaq lazım deyil. Bütün hallarda, bu, istifadəçilərə xarici dil bilgisini öyrətməyə yönəldilib. Onsuz da xarici dil kurslarında yerli dərsliklər deyil, xarici ölkələrdə, ABŞ, İngiltərədə çap olunmuş dərsliklərdən istifadə olunur. Ona görə də hesab edirəm ki, istər dizayn, istər məzmun baxımından bu kimi təcrübələr orta məktəb dərsliklərimizin zənginləşməsinə və şagirdlərdə bu kitabları oxumağa maraq yaradacaq".
Digər təhsil eksperti Rafiq İsmayıl isə xarici dil dərsliklərinin hazırlanmasına əcnəbi mütəxəssislərin cəlb olunmasının bu sahənin inkişafına səbəb olacağını düşünür: "Bəziləri fikirləşir ki, bu sahəyə xarici mütəxəssislərin cəlb olunması Azərbaycanda yerli kadrların olmamasından irəli gəlir. Ancaq mən bu fikirdə deyiləm. Çünki ölkəmizdə olan xarici dil mütəxəssisləri mövcud baza üzərində bu sahəni mənimsəyib. Bu səbəbdən də düşünürəm ki, dərsliklərin hazırlanmasına əcnəbi mütəxəssislərin cəlb olunması daha münasibdir".
Günel CƏLİLOVA
