Elçin Mirzəbəyli: "Bəzi kanallarda tək qadınların deyil, bütövlükdə insanların üzərində şou yaratmaq tendensiyası var"
"Bəzi telekanallarda qadınların problemləri üzərində şou yaradılması cəhdləri müşahidə olunur. Hazırda efirdə qadınların cəmiyyətdə əzilməsini nümayiş etdirən proqramlar yayımlanır". Bunu Milli Televiziya və Radio Şurasının (MTRŞ) Hüquq şöbəsinin müdiri Nemət Cavadov Bakıda "Gender problemləri və media" mövzusunda keçirilən seminarda deyib.
Onun sözlərinə görə, hazırda efirdə olan verilişlərin əksəriyyətində qadınların cəmiyyətdə əzilməsini nümayiş etdirən proqramlar yayımlanır: "Həmin verilişlərdə qadınların problemlərinin həll olunması yolları da göstərilir. Sosial problemlərin həllinə yönəlmiş "Elin gözü", "Çıxış yolu", "Bizimləsən" və s. verilişləri göstərmək olar. Həftə ərzində ümumilikdə efirdə sosial problemlərin həllinə yönəlmiş 38 saatlıq veriliş yayımlanır. Təəssüf ki, bəzən bu verilişlərdə qadınların problemləri üzərində şou yaradılması cəhdləri də müşahidə olunur".
Televiziya və Radio Şurası nümayəndəsinin bu fikrini ekspertlər də təsdiqləyir.
"Xalq Cəbhəsi" qəzetinin baş redaktoru Elçin Mirzəbəyli "Bakı-Xəbər"ə açıqlamasında qeyd etdi ki, bəzi kanallarda tək qadınların deyil, bütövlükdə insanların üzərində şou yaratmaq tendensiyası var: "Təəssüflər olsun ki, bu problem cəmiyyət tərəfindən müzakirə olunsa da, öz həllini tapmayıb. Reytinq savaşı telekanallar arasında bəzi dəyərlərin sıradan çıxmasına zəmin yaradır. Bu tək reytinq amili ilə deyil, qeyri-peşəkarlıqla da bağlıdır. Çünki sosial proqramlarda hər hansı bir mövzunun müzakirəyə çıxarılması əsas amil kimi götürülməli deyil, problem dərindən öyrənilməlidir. Həmin problemin cəmiyyətə verəcəyi mesaj da çox önəmlidir. Kanallar ictimaiyyətə ilk növbədə mesaj ünvanlayır. Müzakirəyə çıxarılan hər hansı bir məsələ gənclər üçün presedent yarada bilər və bəzi dəyərlərin gözdən düşməsinə zəmin yaradar. Bu məsələyə xüsusi diqqət ayırmaq lazımdır".
Həmsöhbətimiz hesab edir ki, mövcud problem inzibati yolla həll olunan deyil. Onun fikrincə, maarifləndirmə missiyası həyata keçirilməlidir. Telekanallarda çalışan insanların sosiologiya haqqında təsəvvürünün formalaşması yönündə iş aparmaq lazımdır: "Sosiologiya və psixologiya haqqında təsəvvürü olmayan, cəmiyyətdə baş verən prosesləri dərk etməyən, dövlətin humanitar siyasətini anlamayan insanın bir sosial proqram aparmağa mənəvi haqqı yoxdur, həm də qeyri-peşəkarlığı buna yol vermir".
Günel CƏLİLOVA
