Adil Qeybulla: "Qanunvericilikdə olan müəyyən boşluqlar aradan qaldırılıb"
Son 2 ildə Azərbaycana özəl klinikalar tərəfindən xaricdən həkim dəvət edilməsi halları 3 dəfə azalıb. Bunu mətbuata açıqlamasında Səhiyyə Nazirliyinin Hüquq və daxili nəzarət sektorunun müdiri Elxan Əzizov deyib.
Onun sözlərinə görə, bu azalmanın əsas səbəbi son illər xaricdə oxuyaraq geri qayıdan Azərbaycan həkimlərinin sayının artmasıdır: "Digər tərəfdən, əvvəllər klinikalar boşluqdan istifadə edərək kimi gəldi Azərbaycana dəvət edirdilərsə, indi artıq başa düşürlər ki, həkim dəvət etmək üçün müəyyən prosedurlar keçmək lazımdır. Klinika əcnəbi həkimin həmin prosedurlardan biri üzrə tələblərə cavab vermədiyini əvvəlcədən gördükdə onu artıq buraya dəvət etmir".
E.Əzizov bildirib ki, bu gün sənədləri qaydasında olan xarici mütəxəssislərin Azərbaycanda ixtisası üzrə işləməsinə icazə verilir və bununla bağlı heç bir problem yaradılmır. Lakin mütəxəssisin ixtisas üzrə sənədi olmadıqda ona imtina cavabı verilir: "Nazirlik çalışır ki, belə mütəxəssislər Azərbaycanda qanuni şəkildə işləsin".
E.Əzizov onu da qeyd edib ki, insanlar özləri də xaricdən dəvət edilən həkimlərin Azərbaycanda öz ixtisasına uyğun işləyib-işləməməsi ilə maraqlanmalıdır. Onun sözlərinə görə, xəstə xarici mütəxəssisin dəvət olunduğu klinikanın qeydiyyat şöbəsindən də, həkimin özündən də xidmət göstərdiyi sahə üzrə icazəsinin olub-olmadığını dəqiqləşdirə, bundan sonra onun xidmətlərindən rahatlıqla istifadə edə bilər.
Bütün hallarda, yerli mütəxəssislərin artması yaxşı tendensiyadır. Bu həm də pasiyentlərin bir sıra xoşagəlməz hallarla üzləşməsi risqini azaldır. Maraqlıdır, bəs ekspertlər buna necə yanaşır?
Məsələyə münasibət bildirən tibb elmləri doktoru Adil Qeybullanın sözlərinə görə, belə bir halın baş verməsi müsbət tendensiyadır: "Bu, bir neçə faktorla izah olunur. Birincisi, yerli mütəxəssis sarıdan Azərbaycanda inkişaf var. Bizim xeyli mütəxəssis Türkiyədə, Almaniyada, Avropanın digər inkişaf etmiş ölkələrində təhsil alıb Azərbaycana qayıdıb. İkincisi, qanunvericilikdə olan müəyyən boşluqlar aradan qaldırılıb. Çünki dünyanın heç bir ölkəsində kim istədi gedib həkim işləyə bilməz. Bunun üçün ya dövlətin xüsusi icazəsi, ya da lisenziya lazımdır. Ancaq Azərbaycanda istənilən adam xaricdən gəlib həkimliklə məşğul olurdu. Deməyim odur ki, bu baxımdan artıq bu məsələyə nəzarət var. Digər tərəfdən, yerli əhali artıq öz həkimlərimizə etibar edir. Bu həm də milli qürur hissidir. Düşünürəm ki, getdikcə bu tendensiya dərinləşəcək. Biz də zamanla Avropanın bir hissəsi olacağıq, mütəxəssis sarıdan Qərb standartlarına çatacağıq və s.". Vidadi ORDAHALLI
