Müəllimlik elə bir zirvədir ki, onu fəth etmək sözün əsl mənasında hər kəsə nəsib olmur. Bu xoşbəxtlik 56 ildir ki, mənim qismətimə düşüb. Öz ömrümü körpə fidanların işıqlı sabahına, onların xoşbəxt gələcəyinə, Vətənə layiqli övlad kimi böyümələrinə həsr etmişəm. Şagirdlərimin möhkəm iradəli, cəsarətli və hünərli, səmimi və vətənpərvər, böyük-kiçiyə hörmət ruhunda böyüməsi üçün qəlbimin hərarətini, gözümün nurunu, zəngin təcrübəmi onlara vermişəm.
Bu çətin, amma müqəddəs və şərəfli yolda inamla irəliləmişəm. Daim üzərimdə çalışmışam, arayıb-axtarmışam, öyrənmişəm. Elə indi də öyrənirəm. Hər dəfə günəş təbəssümlü körpələrə "Ana", "Vətən", "Azərbaycan" kəlməsinin yazılmasını öyrətdikcə böyük sevinc və fərəh hissi keçirmişəm.
Dərsləri elə qurmağa çalışmışam ki, şagirdlərimin hafizəsi, təfəkkürü, bilik mənimsəmə qabiliyyəti çox inkişaf etsin.
Təlimin keyfiyyəti isə müəllimin dərsə hazırlığından, istifadə etdiyi metoddan, elmi-metodik təminatdan asılıdır. Təhsilin inkişafı üçün qarşıda duran ən vacib vəzifə keyfiyyəti daim diqqət mərkəzində saxlamaqdır. Keyfiyyət göstəricisinə isə yalnız yeni yanaşma, yaradıcı münasibət sayəsində nail olmaq mümkündür. Bu gün qiymətləndirmə və monitorinq tədbirlərinin həyata keçirilməsi təhsil prosesində müəllimin məsuliyyətini artırmaqla yanaşı, şagirdlərin bilik səviyyəsinin genişlənməsinə əlverişli şərait yaradır.
İlk növbədə dərsin təşkili, hansı meyarlara əsaslanmaq müəllimdən asılıdır, bu onun hazırlıq səviyyəsindən irəli gəlir. Dərsi təşkil edərkən müəllimin şagirdlərlə qarşılıqlı fəaliyyəti, ünsiyyəti mühüm amildir. Yalnız fəal təlim üsullarına yiyələnən müəllim buna nail ola bilər. Bu isə şagirdlərin müstəqil düşünmək imkanlarını genişləndirir, sərbəst, azadfikirli, müstəqil olmasına impuls verir. Həm də müəllim şagirdə bir şəxsiyyət kimi yanaşmalıdır. Əsas məqsədim təhsilin keyfiyyətcə yeni mərhələyə qalxması istiqamətində bütün səyləri birləşdirərək yaradıcı və təşəbbüskar fəaliyyətə geniş meydan verməkdir. Təhsil sistemindəki müasir təlim üsullarının, İKT-nin, yeni texnologiyaların milli təhsilimizə inteqrasiyasını tətbiq edirəm.
Müəllimin əsas vəzifəsi işini günün tələbləri səviyyəsində qurmağı bacarmasıdır. Məktəb-valideyn, müəllim-şagird münasibətinə böyük önəm verilməlidir. Mən də bunu əsas tutaraq mütəmadi olaraq valideynlərlə açıq görüşlər təşkil edir, hər bir valideynin aramsız dərs proseslərini izləməsinə şərait yaradıram.
Dərslərimi maraqlı və rəngarəng qurmaq üçün interaktiv metodlardan bəhrələnir, hər bir şagirdə fərdi qaydada yanaşmağa xüsusi önəm verir, onun iç dünyasına lazımınca nüfuz etməyə çalışıram. Axı müəllim həm də psixoloqdur. O, şagirdlərə psixoloji cəhətdən yanaşmalı, hər bir şagirdin zəif və müsbət cəhətlərinə lazımınca bələd olmalıdır.
Mütaliənin şagird şəxsiyyətinin formalaşmasında oynadığı rol danılmazdır. Mən də şagirdlərimdə hələ I sinifdən kitab oxumağa, mütaliəyə həvəs oyadıram. Çünki mütaliə uşaqların hərtərəfli inkişafına, onun bilik səviyyəsinin artmasına, söz ehtiyatının zənginləşməsinə, adamlarla mədəni rəftarına kömək edir. R.Rudəki əbəs yerə deməmişdir ki, "Əsl təhsil yalnız mütaliə ilə əldə edilir".
Şagirdlərin dünyagörüşünün formalaşması, şəxsiyyət kimi inkişaf etmələri üçün məktəbdə müxtəlif tədbirlər həyata keçirirəm. Ekskursiyalar, görüşlər təşkil edirəm. O da vacib məsələdir ki, müəllim öyrətdiyinin şagird tərəfindən necə mənimsənildiyinin, necə dərk edildiyinin fərqinə varsın.
Müəllim kimi fəaliyyətimin bir parçası da tarixi hadisələr, ildönümlər və əziz bayramlar münasibətilə keçirdiyim müxtəlif tədbirlərlə bağlıdır. Mühüm bir tədbirə ciddi hazırlıq görürəm. Bu, əbədiyaşar ümummilli lider Heydər Əliyevin anadan olmasının 94-cü ildönümünə həsr olunmuş "Azərbaycan tarixində parlayan günəş" adlı tədbirdir. Mayın 10-da məktəbdə düzənlənəcək tədbirə məktəbin bütün III sinif şagirdləri, müəllimlər və qonaqlar dəvət olunacaq.
Uzun illər ərzində çəkdiyim zəhmət bəhrəsini verib - əməyim layiqincə qiymətləndirilib. Layiq görüldüyüm müxtəlif təltif və mükafatlar sırasına Azərbaycan SSR "Qabaqcıl maarif xadimi" (1977), "SSRİ maarif əlaçısı" (1983), "Metodist müəllim" (1986), "Ali kateqoriyalı müəllim" (1994), "Xan qızı Natəvan" mükafatı (1999), "İnam" fəxri Şərəf diplomu (2007), "Nurlu ziyalı" mükafatı (2007), "Qızıl qələm" fəxri mükafatı (2009), "Tərəqqi" medalı (2009) və s. daxildir.
Bundan başqa 95 məqalə, 4 metodik tövsiyənin müəllifiyəm. Haqqımda 70-dən çox məqalə yazılıb, 2009-cu ildə işıq üzü görmüş "Həyati bacarıqlara əsaslanan təhsil: axtarışlar, ilkin uğurlar" adlı metodik vəsait mütəxəssislər tərəfindən yüksək qiymətləndirilib, 2010-cu ildə "Şagirdlərin nitq mədəniyyəti üzrə sinifdənxaric məşğələlərin proqramı" adlı vəsait maraqla qarşılanıb, 2014-cü ildə "İllər, sizdə nəyim qaldı?" adlı pedaqoci-publisistik məqalələr toplusu - iş təcrübəmi əks etdirən kitab çap olunmuşdur.
Bütün bunlar isə mənim məbədgah adlandırdığım məktəbə, orada təhsil alan canımdan artıq sevdiyim fidan balalara bəslədiyim sonsuz və tükənməz məhəbbətin mənə qaytarılan müjdəsidir. Bəli, mən özümü məktəbdən, şagirdlərimdən ayrı təsəvvür etmirəm. Çünki mən məktəbsiz yaşaya bilmərəm...
Mehparə Həbibli, Səbail rayonundakı 20 nömrəli məktəb-liseyin ibtidai sinif müəllimi, "Tərəqqi" medallı
