Eyyub Hüseynov: "Rusiyadan Azərbaycana idxal olunan zeytun yağları saxtadır"
Adil Qeybulla: "Zeytun yağının ölkəyə idxalı zamanı əsas onun keyfiyyətinə fikir vermək lazımdır"
"Zeytun faydalı bitkidir", "İnsan orqanizminə heç bir zərəri yoxdur", "Zeytun yağı çox xeyirlidir" və başqa bu kimi ifadələri tez-tez eşidirik. Mütəxəssislər zeytun yağının nə qədər xeyirli olduğunu dəfələrlə KİV-ə verdikləri açıqlamada qeyd edib.
Bu gün evdar xanımlar mətbəxdə kərə yağı ilə yanaşı, zeytun yağından da istifadə edir. Bir sıra yeməklərin hazırlanmasında zeytun yağından istifadə olunur. Bəllidir ki, kərə yağı insan orqanizminə ziyandır. Xüsusilə kərə yağının kökəlməyə səbəb olduğu bildirilir. Bu səbəbdən də mütəxəssislər salatların və digər təamların hazırlanmasında zeytun yağından istifadəni məsləhət görür.
Bu gün dükan və marketlərdə müxtəlif adda, müxtəlif ölkələrin istehsalı olan zeytun yağları satılır. Alıcı da bu yağların keyfiyyətli olmasına şübhə ilə yanaşır.
Qeyd edək ki, zeytun Abşeronun nadir bitkilərindəndir. Yarımadanın təbii iqlim şəraiti zeytunçuluğun sənaye əsasında inkişaf etdirilməsi üçün olduqca əlverişlidir. Bu gün ölkədə zeytunçuluğun inkişafına böyük önəm verilir.
Yerli istehsal olan zeytun yağları ilə yanaşı, xarici ölkələrdən də adıçəkilən məhsul idxal olunur. Bazarda Rusiya, Türkiyə, Almaniya və digər ölkələrin istehsalı olan zeytun yağı mövcuddur.
Bu günlərdə "Azərsun Holdinq"in Müşahidə Şurasının sədri Abdolbari Goozal media nümayəndələrinə açıqlamasında qeyd edib ki, Azərbaycana Rusiyadan idxal olunan bir sıra zeytun yağları saxtadır və insan orqanizmi üçün təhlükəlidir: "Təsəvvür edin, Rusiyadan zeytun yağı gətirilir, bu ölkədə zeytun ümumiyyətlə bitmir. Araşdırırıq ki, rafinə olunmamış məhsulun içərisinə bəzi qatqılar qatıb zeytun yağı kimi bizə satırlar. Halbuki, zeytun yağından əksəriyyət müalicə və sağlamlıq üçün istifadə edir, necə belə iş görmək olar?".
Azad İstehlakçılar Birliyinin rəhbəri Eyyub Hüseynov "Bakı-Xəbər"ə açıqlamasında qeyd etdi ki, bu gün ölkəyə idxal olunan zeytun yağlarının əksəriyyəti saxtadır: "Biz yağlarla bağlı dəfələrlə araşdırma aparmışıq. Xarici ölkələrdən Azərbaycana qarğıdalı yağı altında naməlum tərkibli yağlar gətirilir. Azad İstehlakçılar Birliyi öz hesabına ölkəyə gətirilən yağların bir qisminin tərkibini araşdırıb. Məlum olub ki, ölkəyə idxal olunan yağların əksəriyyəti saxtadır".
Həmsöhbətimizin sözlərinə görə, Rusiyadan Azərbaycana idxal olunan zeytun yağları da saxtadır. Saxta yağların tərkibində rəngləndirici, aromatizator qatılır. İstehlakçılar sonuncunun sayəsində saxta yağın qoxusunu öldürməyi düşünür.
E.Hüseynovun sözlərinə görə, insanların istehsal yağlarına üstünlük verməsi daha yaxşı olardı. Üstəlik, bütün istifadəçilər bilməlidir ki, tərkibində soya olan yağların 98 faizi modifikasiya olunub: "Tərkibində soya olan yağlardan uzaq durmaq lazımdır. Zeytun yağlarından istifadə edən insanlar onları mağazadan əldə edərkən üzərində yazılan tərkib hissəsini yaxşı oxumalıdır: "Hansı yağın üzərində qarışıq yazılıb, insanlar o yağlardan uzaq durmalıdır. Çünki bu yağların tərkibi qarışıqdır. Zeytun yağlarında yerli yağlara üstünlük vermək məsləhətdir".
Tibbi ekspert, professor Adil Qeybulla bildirdi ki, zeytun yağının ölkəyə idxalı zamanı əsas onun keyfiyyətinə fikir vermək lazımdır: "Əhali arasında da bunun təbliğatını gücləndirmək lazımdır. Zeytun yağı standarta uyğun hazırlanmayıbsa, bunun orqanizmə ziyanı var. Tərkibi zeytun yağı deyilsə, dad xüsusiyyətləri müxtəlif qatqılardan istifadə olunmaqla zeytun yağı səviyyəsinə çatdırılıbsa, əlbəttə, belə yağlar insan orqanizminə ziyanlıdır".
Ekspertin sözlərinə görə, zeytun yağı insan orqanizminə çox xeyirlidir: "Hazırda hipodinamiya, yəni insanların az hərəkətliliyi dövründə xolestirinin bədəndə depolaşmasının qarşısını alır. Yağlı qidalar, kərə yağları orqanizmdə müəyyən xəstəliklər yaradır. Bilirsiniz ki, infarktın yaşı da xeyli cavanlaşıb. Bu məhz qeyd olunan faktorla bağlıdır. Zeytun yağı bitki yağıdır, bunun tərkibində xolestirin yoxdur. Bu yağ texniki baxımdan düzgün hazırlanıbsa, faydalı yağlardan hesab olunur".
Günel CƏLİLOVA
