Məhərrəm Zülfüqarlı: "Dərs keçə bilməyən, savadı digər müəllimlərdən aşağı olan pedaqoqa diplomun necə verildiyi araşdırılmalıdır"
Əjdər Ağayev: "Azərbaycandakı məktəblərin bir çoxunda təlim-tədris səviyyəsi aşağıdır"
"Müəllimlərin çoxunun peşəkarlıq səviyyəsi aşağıdır". Bu, Dövlət İmtahan Mərkəzinin "Abituriyent" jurnalının 12 saylı buraxılışında dərc edilən hesabatda öz əksini tapıb.
Hesabatda qeyd olunur ki, orta statistik abituriyent fənlər üzrə məktəb proqramının yalnız 29-54 faizini mənimsəyir: "Bu, ümumtəhsil müəssisələrinin böyük qismində tədris prosesinin normal aparılmamasından, tələbkarlığın zəifliyindən, ən başlıcası isə, müəllimlərin çoxunun peşəkarlıq səviyyəsinin aşağı olmasından və tədris prosesində yeni təlim üsulları və texnologiyalarından istifadə edə bilməməsindən irəli gəlir".
Dövlət İmtahan Mərkəzinin hesabatında müəllimlərin peşəkarlıq səviyyəsinin aşağı olması ilə bağlı qeydlər təhsil ekspertləri tərəfindən birmənalı qarşılanmır.
Təhsil eksperti Məhərrəm Zülfüqarlı "Bakı-Xəbər"ə açıqlamasında qeyd etdi ki, DİM-in müəllimlərlə bağlı bu cür rəy hazırlaması düzgün deyil: "Orta məktəbdə çalışan müəllimlərin içərisində savadlıları da var, pisləri də. Bunun da səbəbi məktəbdə deyil, ali məktəbdə tədris almayıb saxta yolla diplom almaqla bağlıdır. Bu bir faktdır. Problemə birmənalı yanaşmaq olmaz. Yaranmış vəziyyətin həlli istiqamətində aidiyyəti qurumlar məşğul olmalıdır".
Həmsöhbətimizin fikrincə, məsələyə fərdi yanaşmaq lazımdır: "Dərs keçə bilməyən, savadı digər müəllimlərdən aşağı olan pedaqoqa diplomun necə verildiyi araşdırılmalıdır".
M.Zülfüqarlı onu da əlavə etdi ki, hesabatda müəllimlərin çoxunun peşəkarlıq səviyyəsinin aşağı olmasının göstərilməsi müəllim adına xələl gətirir.
Digər təhsil eksperti Əjdər Ağayev isə bildirdi ki, müəllimlər arasında yaxşıları da, pisləri də var: "Hansısa məktəbdə elə sinif var ki, oradakı şagirdlərin nailiyyəti diqqəti çəkir, eləcə də bəzi siniflərdə təhsil alanlar heç yazıb-oxumağı doğru-düzgün qavraya bilmir. Elə məktəblər var ki, onların müəllimləri respublikada tanınır".
Həmsöhbətimizin sözlərin görə, Azərbaycandakı məktəblərin bir çoxunda təlim-tədris səviyyəsi aşağıdır. Müəyyən texnoloji imkanlardan lazımınca istifadə olunmur: "Sadəcə, müəllimlərin dərs demək səyləri bəzi tədris müəssisələrində aşağıdır. Onu da unutmaq lazım deyil ki, müəllimlərin müəyyən qismi diaqnostik imtahandan keçib. İmtahan nəticəsi əsasında müəllimlərin bilik səviyyəsi müəyyən olunub. İmtahandan keçməyən müəllimlərimiz də var".
Ekspert bildirdi ki, hansısa sinifdə təhsil alan şagirdlərin əksəriyyətinin bilik səviyyəsi aşağıdırsa, təbii ki, bunun günahı müəllimdədir.
Günel CƏLİLOVA
