İlqar Hüseynli: "Paytaxtın bütün küçələrində küçə ticarətinə icazə verilə bilməz, bunun üçün xüsusi yerlər ayrılmalıdır"
Paytaxt Bakı bu il bir neçə beynəlxalq yarışa ev sahibliyi edəcək. Onlardan biri Bakı-2017 IV İslam Həmrəyliyi Oyunlarıdır. İslam Həmrəyliyi Oyunları ilə bağlı paytaxt küçələrinin bəzi ərazilərində küçə ticarəti ləğv olunub.
Bakı Şəhər İcra Hakimiyyətinin Xidmət və Ticarət Departamentinin mətbuat xidmətinin rəhbəri Əlabbas Bağırov media nümayəndələrinə açıqlamasında qeyd edib ki, İslamiada ilə bağlı bəzi ticarətçilərə icazələrin verilməsi dayandırılıb: "İstisna hallarda bəzi parklarda, bağlarda, insanların hərəkətinə və rahatlığına maneçilik törətməyən ərazilərdə küçə ticarətinə icazə verilirdi. Bakı-2017 IV İslam Həmrəyliyi Oyunları ilə bağlı paytaxta xarici turistlərin gəlişinin çoxluğunu nəzərə alaraq, artıq həmin hallarda da ticarətə icazə verilməsi dayandırılıb. Bu məsələlərə Oyunlar başa çatandan sonra yenidən baxılacaq".
İslamiada ilə bağlı bəzi ərazilərdə səyyar satışın ləğv olunmasına münasibət bildirən sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki, küçə ticarəti aidiyyəti qurumların dəstəyi ilə sivil formaya salınmalıdır: "Dünyanın ən inkişaf etmiş ölkələrində belə küçə ticarəti mövcuddur. Məsələn, Nyu-York şəhərində küçə ticarəti var. Həmin şəhərin sakinləri böyük həvəslə küçə ticarətinə maraq göstərir. Küçə ticarəti vətəndaşlar üçün əlçatandır. Çünki bu satış formasında qiymətlər həm münasib olur, həm də turistlər üçün maraqlıdır".
Həmsöhbətimiz hesab edir ki, milli mədəniyyətimizi əks etdirən çərçivədə küçə ticarətini yaratmaq olar: "Təbii ki, bunun üçün xüsusi yerlər ayrılmalıdır. Həmin yerlərdə turistlərin diqqətini cəlb edən milli suvenirlər də satışa çıxarıla bilər. Paytaxtın bütün küçələrində küçə ticarətinə icazə verilə bilməz".
Ekspertin sözlərinə görə, qardaş Türkiyədə küçə ticarəti geniş yayılıb. Küçə ticarəti ilkin biznesin simptomları sayılır.
Günel CƏLİLOVA
