Ənvər Fərəcov: "Bunun nəticəsində turistlərin Azərbaycana marağı artacaq"
Məlum olduğu kimi, mayın 12-dən 22-dək Bakı şəhərində IV İslam Həmrəyliyi Oyunları keçiriləcək. İslam Həmrəyliyi Oyunları ilə əlaqədar Xəzərdən başlayan su səyahəti davam edir. Bununla bağlı rayonlarda su festivalları keçirilir. Xəzərdən başlayan səyahət çərçivəsində təşkil edilən su festivallarının keçirilməsində əsas məqsəd xalqımıza idman bayramı əhval-ruhiyyəsini bəxş etməklə yanaşı, eyni zamanda həmrəylik və sevinc hissini aşılamaqdır.
Məlumat üçün qeyd edək ki, 37 gün ərzində ölkəmizin 15 bölgəsində reallaşdırılacaq "Xəzərdən başlayan səyahət" proqramı 3 min kilometr məsafəni qət etməklə, mayın 12-də Bakıda İslam Həmrəyliyi Oyunlarının açılış mərasimi ilə başa çatacaq. Ölkəmizin müxtəlif şəhər və rayonlarından olan uşaqlar və idmançılar göl, çay, şəlalə və bulaqlardan topladıqları Azərbaycanın saf suları ilə Bakıya toplaşacaq İslam dünyasının 50-dən artıq dövlətinin nümayəndə heyətlərini salamlayacaq. Müşahidələr göstərir ki, su festivallarına maraq böyükdür. Ümumilikdə, keçirilən su səyahətlərinin Azərbaycan üçün nə əhəmiyyəti var? Məsələyə münasibət bildirən ekspert Ənvər Fərəcovun sözlərinə görə, bunun bir sıra üstünlükləri var: "Əvvəla bunun simvolik əhəmiyyəti var. Belə yarışmalar üçün xarakterik olaraq bu cür mərasimlər keçirilir. Belə ki, bu kimi oyunlar keçirilərkən, bənzər tədbirlər təşkil olunur. Yəni bunun tarixi qədim dövrlərə dayanır. Azərbaycanda 2015-ci ildə idman yarışması keçirilərkən Suraxanıdan götürülən məşəl ölkənin rayonlarında gəzdirildi. Hesab edirəm ki, rayonlarda keçirilən su festivalları ölkənin tanıdılmasına xidmət edir. Eyni zamanda bu, tədbirin möhtəşəm keçirilməsinə öz töhfəsini verəcək. Həmçinin, bunun nəticəsində turistlərin Azərbaycana marağı artacaq. Yəni bunun bir sıra üstünlükləri olacağını düşünürəm". Vidadi ORDAHALLI
