Aprelin 28-də DİN BMİ Həyat Əhəmiyyətli Obyektlərin Mühafizəsi Üzrə Polis Alayında yeni xidməti avtomobillərin təqdimetmə mərasimi olub. Mərasimdə BMİ-nin rəisi, polis general-mayoru Yaşar Əliyev iştirak edib.
Alay komandiri, polis polkovniki İmran Mahmudov mərasimə hazırlıq barədə raport verdi. Sonra yeni verilən maşınlara baxış keçirildi və polis general-mayoru Yaşar Əliyev tədbir iştirakçılarına daxili işlər naziri, general-polkovnik Ramil Usubovun salamlarını çatdıraraq əldə edilən uğurların əsasında dövlət başçının və DİN rəhbərliyinin xüsusi diqqət və qayğısının durduğunu qeyd edib.
Baş İdarə rəisi bildirib ki, ölkə başçısının rəhbərliyi ilə Azərbaycan bu gün regionun lider dövlətinə çevrilib. Ölkəmizin hər yerində quruculuq və abadlıq işləri sürətlə davam etdirilir. Bu yüksəliş daxili işlər orqanlarından da yan keçməyib. Dövlət başçısının ali diqqət və qayğısı nəticəsində DİO-nun maddi- texniki bazası gündən-günə yenilənir, inkişaf edir.
O da diqqətə çatdırıldı ki, müstəqilliyimizin ilk illərində mühafizə polisi bir çox sınaqlarla üzləşsə də, vəzifələrinin öhdəsindən layiqincə gəlib.
Ölkənin hər il mötəbər idman yarışlarına, beynəlxalq tədbirlərə ev sahibliyi etməsinə diqqət çəkən Y.Əliyev bu il də möhtəşəm tədbirlər ili olduğunu vurğuladı. IV İslam həmrəyliyi oyunlarının paytaxtımızda keçirilməsini ölkəmizin ən böyük uğurlarından biri kimi dəyərləndirən natiq bu tədbirlər zamanı ictimai asayişin və daxili təhlükəsizliyin etibarlı qorunmasında mühafizə polisinin də üzərinə böyük məsuliyyət düşdüyünü xatırlatıb və ayıq-sayıq, nizam-intizamlı olmağı tövsiyə edib.
Daha sonra xidmət üçün ayrılan 16 yeni avtomobil rayon mühafizə idarələrinin rəislərinə təqdim edilib.
Məlumat üçün bildirək ki, mühafizə xidməti üçün ayrılan "Toyota korella" markalı maşınlar yüksək manevr imkanlarına və az yanacaq sərfiyyatına malikdir.
Hafiz Təmirov, polis mayoru
