Gülnarə Eyvazova: "Əcnəbi bələdçilər xaricilərə bizim tariximiz haqqında doğru-düzgün məlumat vermir"
"Azərbaycana səfər edən turistlərin özləri ilə əcnəbi bələdçi gətirməsinin qarşısını almaq üçün qanunvericilikdə müəyyən dəyişiklik etmək olar". Bunu Mədəniyyət və Turizm Nazirliyinin Turizm şöbəsinin müdiri Aydın İsmiyev media nümayəndələrinə açıqlamasında deyib.
Onun sözlərinə görə, hazırda əsasən ərəb turistləri Azərbaycana gəldikdə özləri ilə bələdçi gətirir: "Əcnəbilərlə bələdçilərin gəlməsi halları axın formasında deyil. Amma müəyyən zamanlarda bu hallar müşahidə edilir. Bu bələdçilər bəlkə də turistlərə abidələrimiz, tarixi yerlərimiz haqqında düzgün olmayan, fərqli məlumat verirlər?! Ona görə də qanunvericilikdə qeyd olunmalıdır ki, bələdçilər akkreditasiyadan keçib kart aldıqdan sonra bələdçilik edə bilər. Əgər bələdçinin akkreditasiya kartı yoxdursa, onun bələdçilik etməyə səlahiyyəti yoxdur".
A.İsmiyev bildirib ki, hazırda Azərbaycanda bələdçi kimi fəaliyyət göstərmək istəyən şəxslərin hamısı Mədəniyyət və Turizm Nazirliyinin Azərbaycan Turizm və Menecment Universiteti tərəfindən akkreditasiyadan keçirilir.
Bələdçilərlə bağlı qanunvericiliyə ediləcək dəyişiklik Azərbaycanın turizm sahəsinə necə təsir edəcək?
Bakı Turizm Şirkətinin nümayəndəsi Gülnarə Eyvazova "Bakı-Xəbər"ə açıqlamasında qeyd etdi ki, əcnəbi bələdçilərin kütləvi şəkildə Azərbaycana gəlməsinin qarşısı alınmalıdır.
O bildirdi ki, Azərbaycanın peşəkar bələdçiləri var: "Turizm və Menecment Universitetinin peşəkar bələdçiləri var. Ölkəmizə gələn əcnəbi turistlər bizim bələdçilərdən razı qalır, onların məlumatı düzgün və maraqlı şəkildə izah etdiyini deyirlər.
Həmsöhbətimizin sözlərinə görə, əcnəbi bələdçilərin Azərbaycana gəlməsinin qarşısı qanunvericiliklə alınmalıdır: "Əcnəbi bələdçilər Azərbaycan tarixi və ya mədəniyyəti, bölgələrimizin hər bir guşəsi barədə bizdən məlumatlı ola bilməz. Bu səbəbdən də öz bələdçilərimizin əcnəbi turistlərə bələdçilik etməsi daha münasibdir. Çünki əcnəbi bələdçilər xaricilərə bizim tariximiz haqqında doğru-düzgün məlumat vermir. Belə olan halda, xaricilər bizim keçmişimiz barədə yanlış fikirdə olur".
Günel CƏLİLOVA
