Eyyub Hüseynov: "Siqaret çəkən adam nikotinə aludədir, ondan asılıdır"
"Bəzi layt siqaretlərin üzərində nikotinin az olması barədə məlumatın yazılması tütünə qarşı mübarizədə problem yaradır. Layt siqaretlərin insan orqanizminə ziyansız olması barədə verilən məlumatlar absurddur". Bunu Milli Məclisin Səhiyyə komitəsinin sədri Əhliman Əmiraslanov "Tütünlə mübarizəyə dair Azərbaycan qanunvericiliyinin gücləndirilməsi" mövzusunda keçirilən tədbirdə çıxış edərkən deyib.
Ə.Əmiraslanov bildirib ki, dünyada tütünlə mübarizəyə qarşı hazırlanan qanunlarda birdən-birə sərt tədbirlər nəzərdə tutulmur: "Birdən-birə ciddi sərtləşdirilmiş tədbirlər həyata keçirməyin nəticəsinin olacağına inanmıram. Biz nə qədər qadağalar qoysaq da, tütündən istifadə etmənin qarşısını tam ala bilməyəcəyik. Burada siqaretin keyfiyyəti məsələsi ortaya çıxır. Dünyada siqaret istehsal edən ölkələr buna qarşı mübarizə aparmağa başlayanda öz məhsullarını digər ölkələrə göndərir. Eyni zamanda, ölkəyə gətirilən siqaretlərin keyfiyyəti də müzakirə mövzusu olmalıdır".
Layt markalı siqaretin tərkibində nikotinin olması barədə fikrə münasibət bildirən Azad İstehlakçılar Birliyinin rəhbəri Eyyub Hüseynov "Bakı-Xəbər"ə açıqlamasında bunları qeyd etdi: "Adıçəkilən siqeretin üzərində az miqdarda nikotinin olmasının yazılması istehlakçının aldadılması deməkdir. Siqaret çəkənlər bu yazılanlara aldanaraq layt markalı siqaretin istifadəçisinə çevrilir. Bu siqaretə öyrəşdikdən sonra, istədiyi dozanı almayınca, həmin tütün vasitəsindən əl çəkən deyil. Siqaret çəkən adam nikotinə aludədir, ondan asılıdır".
Həmsöhbətimiz onu da əlavə etdi ki, layt siqaretləri insan orqanizminə zərərlidir. Ümumiyyətlə, bütün tütün məmulatları insan sağlamlığına ziyandır: "O üzdən, hər hansı bir siqaret markasının tərkibində nikotinin az olduğunu qeyd edərək insan üçün zərərsizdir yazılması düzgün deyil".
E.Hüseynov onu da vurğuladı ki, "Tütünlə mübarizəyə dair Azərbaycan qanunvericiliyinin gücləndirilməsi" mövzusunda keçirilən tədbirdə iştirak edərək, bir sıra təkliflər irəli sürüb: "Azərbaycanda filtrsiz siqaretlər tam qadağan olunmalıdır. Həmçinin, keyfiyyətsiz siqaretlərin istehsalı dayandırılmalıdır. Məsələn, Şəkidə "Azəri" korporasiyasının istehsal etdiyi siqaretlər insan sağlamlığına zərərli olmaqla yanaşı, standartlara uyğun deyil".
Günel CƏLİLOVA
