Gözümüz önündə ağlının və biləyinin gücü ilə cinsindən asılı olmayaraq uğur qazananlara hər zaman əlçatmaz bir zirvə kimi baxırıq, onlara oxşamağa çalışırıq. Bəs, onları çoxumuzdan fərqləndirən nədir? Bax, elə bu sualın cavabını həmkarımızın ömür və uğur yolunu izlədikdən sonra tapa bildik: zəhmət, fədakarlıq, güclü və birinci olmaq üçün hər çətinliyə qatlaşmaq istəyi...
İdman aləmi onu usta karateçi kimi tanıyır. Ölkə və beynəlxalq yarışlarda birincilik qazanıb, ən mötəbər kürsülərdən səsi gəlir. Şərəfinə himnimiz səsləndirilib, bayrağımız ucaldılıb. İdmanda qazandığı uğurları görən DİN rəhbərliyi daha bir arzusunu çin edib, ona polis leytenantı rütbəsi verilməklə həm də çiyinlərinə etibarı və etimadı doğrultmaq adlı böyük bir məsuliyyət qoyulub. Ədilə Qurbanova haqqında çox yazılıb, adı hər yerdə hörmətlə çəkilib. Onunla həmişə ünsiyyətdə olanda görmüşük ki, qazandığı uğurlarla qürrələnmir, öyünmür. O, sözünün də çəkisini bilən adamdır, söz verdimi, arxasında durmağı bacarır. Bu dəfə də verdiyi sözün arxasında durdu, əldə etdiyi uğurla bir daha təsdiq etdi ki, istənilən idman növündə gücünü sınayar, güclülər sırasında yer ala bilər.
O, sözünün üstündə durdu. Hətta hər kişinin cürət edib gücünü sınamaqda çətinlik çəkdiyi idman növündə birinci oldu. Onun qələbə xəbərini eşidəndə Sabunçu Rayon Polis İdarəsində hamı, hər kəs idarəyə yenicə təyin olunmuş bu idmançı qızın uğurlarından danışırdı. Bəli, sözün əsl mənasında bunun adı heyrət idi...
Həmkarımızı təbrik edənlərin sırasında biz də vardıq. Ancaq duyğularımızı qələmə almaq üçün onunla mütləq görüşməliydik. Və görüşdük də...
Qarşımızda incə, gözəl bir xanım durub. Gözündən sanki günəş yağır. Deyir ki, idmanın paurliftinq növü bütün dünyada məşhurdur. Azərbaycanda kifayət qədər güclü kişi idmançılar var. O isə güclülərin cərgəsinə qoşulmaq üçün illərlə yox, cəmi 4 ay məşğul olub. Çəkisi 53 kiloqramdır. Azərbaycan çempionatında 4 rəqiblə üz-üzə gəlib. Yerdən təkanla qaldırmaqda 110 kiloqramın və 130 kiloqramın öhdəsindən bacarıqla gəlib və çempion adını qazanıb. Bu təsnifat turniri onun həm də oktyabr ayında Vətənimizdə keçiriləcək dünya çempionatında təmsil olunmasına hazırlıq xarakteri daşıyır.
Sabunçu RPİ-nin kadr və peşə hazırlığı üzrə baş inspektoru kimi işi çox olsa da, tapşırıqların öhdəsindən uğurla gəlir. Hazırda sentyabrda Azərbaycan kuboku uğrunda keçiriləcək yarışa da hazırlaşır karateçi, paurliftinqçi polis leytenantı Ədilə Qurbanova.
Uğurların davamlı olsun, həmkarımız!
Könül Nəbizadə, Hafiz Təmirov
