Məlahət Mürşüdlü: "İbtidai sinif müəllimlərinin laqeydliyi ucbatından 91 yeniyetmə bu gün nə oxumağı, nə də yazmağı bacarır"
Ötən il Azərbaycanda keçirilən buraxılış imtahanları nəticəsində 9 və 11-ci siniflər üzrə bəzi şagirdlərin yazıb-oxumağı bacarmaması məlum olub. Dövlət İmtahan Mərkəzinin nəşr etdiyi "Abituriyent" jurnalının 12-ci sayında qeyd olunub ki, 9 və 11-ci siniflərin şagirdləri arasında nəinki tədris proqramını minimum mənimsəməyənlər, hətta yazıb-oxumaqda çətinlik çəkənlər və ya ümumiyyətlə yazıb-oxumağı bacarmayanlar da aşkarlanıb.
11-ci sinif şagirdləri arasında 22 nəfər, 9-cu sinif şagirdləri arasında isə 69 nəfər belə şagird olub: "Bu statistika imtahan rəhbərlərinin protokolları əsasında ortaya çıxıb. Bu cür halların imtahan rəhbərlərinin əksəriyyətinin protokollarında qeyd olunmamasını nəzərə alsaq, yuxarıda göstərilən faktların, əslində, daha çox olduğunu və vəziyyətin daha acınacaqlı olduğunu ehtimal etmək mümkündür".
Belə şagirdlərin 9-cu, 11-ci sinfə qədər gəlib çatması müəmmalıdır. 11-ci siniflər üzrə yazıb-oxumağı bacarmayan şagirdlərin rayonlar (şəhərlər) üzrə sayı belədir: Lənkəran rayonunda 4 nəfər, Bakı şəhərində, Bərdə, Füzuli, Gədəbəy, Salyan rayonlarının hərəsindən 2 nəfər, Ağdam, Cəbrayıl, Göyçay, Göygöl, Kürdəmir, Lerik, Neftçala və Sabirabad rayonlarının hər birindən 1 nəfər.
9-cu siniflər üzrə yazıb-oxumağı bacarmayan şagirdlərin rayonlar (şəhərlər) üzrə sayı belədir: Cəlilabad rayonunda 8 nəfər, Salyan rayonunda 6 nəfər, Füzuli, Lənkəran və Qazax rayonlarının hər birindən 3 nəfər, Daşkəsən, Biləsuvar, Gədəbəy, Göygöl, Qusar, Tovuz və Ucar rayonlarının hər birindən 2 nəfər, Gəncə, Şirvan və Yevlax şəhərlərinin, Kəlbəcər, Kürdəmir, Neftçala, Qax, Qobustan, Şəki, Zaqatala və Zərdab rayonlarının hərəsindən 1 nəfər.
9-11-ci sinfi bitirən 91 şagird və ya məzunun oxuyub yaza bilməməsi təəssüf doğurur.
Azad Müəllimlər Birliyinin rəhbəri Məlahət Mürşüdlü "Bakı-Xəbər"ə açıqlamasında qeyd etdi ki, 91 məzunun öz adını yaza bilməməsi təəssüf doğurur: "Dövlət İmtahat Mərkəzində özüm oldum və təəssüflə bu xəbərin düzgün olduğunu bildirirəm. 9-11-ci sinfi bitirən məzunların arasında elemantar biliyi olmayanlar var. Bu fakt daha çox rayon yerlərində qeydə alınıb. Bunun müxtəlif səbəbləri var. İlk olaraq uşaqların məktəbə davamiyyətinin zəif olması ilə bağlıdır. Davamiyyətsizlik daha çox ucqar yerlərdə qeydə alınır. Uşaqlar dərs oxumaqda deyil, kənd təsərrüfatında valideynlərə kömək etməkdə maraqlı olur. Fiziki cəhətdən sağlam olmayan uşaqlar arasında bu hal baş verə bilər. Belə bir fakt varsa, məktəb rəhbərliyi həmin uşaqların evdə təhsil almasını təmin etməli idi.
İbtidai sinif müəllimlərinin laqeydliyi ucbatından 91 yeniyetmə bu gün nə oxumağı, nə də yazmağı bacarır".
Həmsöhbətimizin sözlərinə görə, uşaqların elementar bilik alması üçün məktəb rəhbərliyi səy göstərməlidir: "Davamiyyətə ciddi nəzarət olmalıdır. Müəllim şagirdə laqeyd yanaşırsa, o pedaqoqla bağlı tədbir görülməlidir. Uşaq dərs proqramını dərk etmirsə, müəllim o uşaqlarla əlavə məşğələ təşkil etməlidir. Bu işlər ibtidai sinifdə görülməlidir ki, 16 yaşında olan yeniyetmə bu gün adını yazmaqda və ya hər hansı bir cümləni oxumaqda çətinlik çəkməsin".
Günel CƏLİLOVA
