Şahin Camalov: "Həmin avtomobillərin əksəriyyəti deformasiyaya uğrayıb"
Digər hərəkət iştirakçıları üçün təhlükə yaradan köhnə avtomobillər istifadədən yığışdırılmalıdır. Belə bir təkliflə Milli Məclisin deputatı Elmira Axundova çıxış edib. Onun sözlərinə görə, artıq Rusiyada bu proses başa çatıb.
Məsələ ondadır ki, Rusiyada texniki cəhətdən, hətta xarici görünüşdən köhnə olan avtomobillərin müqabilində insanlara müəyyən məbləğdə pul və ya çek verilib: "Bilirəm ki, Azərbaycanda bu prosesi həyata keçirmək bir az çətindir. Lakin təhlükə yaradan köhnə avtomobillər texniki baxışdan keçməməlidir. Bu maşınların nə qabaq, nə arxa işıqları işləyir, təxminən 30 km/s sürətlə hərəkət edirlər. Bu da xüsusən axşam saatlarında yolda ciddi təhlükə yaradır. Belə avtomobilləri istifadədən yığışdırmaq lazımdır. Onlar hər an həm özləri, həm də digərləri üçün təhlükə yaradır".
Deputat təklif edir ki, köhnə avtomobil sahiblərinə güzəştli şərtlərlə yeni avtomobillər verilsin. Onun fikrincə, bu minvalla problem həll oluna bilər: "Əlbəttə, köhnə avtomobilləri insanların əlindən almaq olmaz, şəxsi mülkiyyətləridir. Təklifim ondan ibarətdir ki, köhnə avtomobil sahiblərinə, kiçik də olsa, misal üçün, 500-1000 manat məbləğində kompensasiya, eyni zamanda, yerli zavoddan onlara güzəştli şərtlərlə yeni avtomobil verilsin. Misal üçün, avtomobilin qiyməti yeddi min manatdırsa, onlara 5 min manata, həm də uzunmüddətli kreditlə verilsin. Bu, ölkədə avtomobil istehsalına da müsbət təsir edər. Düşünürəm ki, insanlar da bununla razılaşar. Nəyə görə bu cür şərtlərlə təzə maşın almasınlar?".
Ümumiyyətlə, köhnə avtomobillərin istifadə olunması insanların həyatı üçün təhlükə yaratdığı üçün, zaman-zaman bu məsələ qaldırılıb.
Maraqlıdır, ekspertlər problemin həlli ilə bağlı sözügedən təklifə necə yanaşır? Məsələyə münasibət bildirən "Təhlükəsiz Yol" Alyansının koordinatoru Şahin Camalovun sözlərinə görə, Azərbaycanda xeyli sayda istifadəyə yararsız, amma hələ də istismar olunan avtomobil var: "Bu da, sözün həqiqi mənasında, bir sıra istiqamətlərdə ciddi narahatlıq yaradır. Problem ondadır ki, təhlükəsizlik baxımından bu avtomobillərin müasir sistemlərə cavab verməsi qətiyyən mümkün deyil. Digər tərəfdən, sözügedən avtomobillər ekologiyanı çirkləndirir. Həmin avtomobillərin əksəriyyəti deformasiyaya uğrayıb. Ona görə də parlamentdə səslənən təklifi dəstəkləyirəm. Hesab edirəm ki, bu yolla problemi həll etmək olar. Bu təcrübə Rusiyada tətbiq olunub və çox yaxşı da nəticə verib. Ona görə də bunu Azərbaycanda tətbiq etmək məqsədəuyğundur. Təklifləri müsbət qiymətləndirirəm. Təki bu problem öz həllini tapsın. Çünki doğrudan da bu avtomobillərin istismar olunması narahatlıq yaradır".
Vidadi ORDAHALLI
