Könül Vaqifqızı: "Aztəhsilli qadınların zorakılıq qurbanı olmasının səbəbi onların öz hüquqlarını bilməməsidir"
Məişət zorakılığı, gender bərabərsizliyi, erkən nikahlar, cinsi ayrıseçkilik, seksual təcavüz kimi ifadələr son zamanlar sosial həyatımızda çox işlənir. Qadınların zorakılıq qurbanına çevrilməsinin qarşısının alınması istiqamətində müxtəlif formatda işlər görülür. Aidiyyəti qurumlar və vətəndaş cəmiyyəti mütəmadi olaraq maarifləndirici xarakterli tədbirlər keçirir. Ancaq buna baxmayaraq, yenə də qadınlar zorakılığın qurbanı olur. Aparılan araşdırmalara görə, aztəhsilli, iqtisadi cəhətdən asılı qadınlar zorakılığa daha çox məruz qalır.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova "Qadın sahibkarlığının inkişafı: problemlər və perspektivlər" mövzusunda keçirilən beynəlxalq konfransda çıxışı zamanı bildirib ki, aztəhsilli, iqtisadi cəhətdən asılı olan qadınların zorakılığa məruz qalmasına daha çox rast gəlinir.
Məsələ ilə bağlı ekspertin fikrini öyrəndik.
Psixoloq Könül Vaqifqızı "Bakı-Xəbər"ə açıqlamasında qeyd etdi ki, istənilən ölkədə iqtisadi cəhətdən yoldaşından asılı olan qadınlar zorakılığa məruz qalıb: "Bu tip qadınlar əksərən iqtisadi zorakılığın qurbanı olur. Onlar yoldaşından, atasından, qardaşından və ya digər yaxınından maddi cəhətdən asılı qalır.
Azərbaycanda kişilərin qadınları özlərindən iqtisadi cəhətdən asılı saxlamasının kökündə mentalitet, qədim adət-ənənə və "kim nə deyər" düşüncəsi durur. Əvvəllər "qadın işləməz" deyə bir fikir, böyüklərin qız uşaqlarına "o gün olsun ailə qurub ər çörəyi yeyəsən" kimi alqışları da vardı. Onlar düşünürdü ki, ən xoşbəxt qadın ərinin qazancı ilə dolanandır. Ancaq fikirləşmirdilər ki, bu onu kişidən asılı vəziyyətə salır. Məsələn, həyat yoldaşı tərəfindən fiziki, psixoloji təzyiqlərə məruz qaldığı halda, səsini çıxara bilməyəcək. Çünki iqtisadi cəhətdən zəifdir, asılıdır. Bundan əlavə, övladları var və çıxıb getsə, onlara baxa bilməyəcək. Bu da kişilərdə bir arxayınlıq yaradır - "mən səndən üstünəm!".
Aztəhsilli qadınların zorakılıq qurbanı olmasına gəlincə, psixoloq vurğuladı ki, bunun səbəbi həmin qadınların öz hüquqlarının bilməməsidir: "Təhsilsiz qadınlar düşünür ki, onlar yoldaşı tərəfindən zorakılığa məruz qala bilər. Onlar üçün belə bir fikir var ki, "kişi qadını həm sevər, həm də döyər". Bu düşüncə ilə onlar zorakılığa məruz qalır".
Günel CƏLİLOVA
