Aprelin 28-i görkəmli oftalmoloq alim, Əməkdar Elm Xadimi, akademik Zərifə xanım Əliyevanın doğum günüdür.
Respublikamızda tibb elminin inkişafına mühüm töhfələr vermiş akademik Zərifə xanım Əliyevanın anadan olmasının 94 illiyi paytaxtın Nəsimi rayonunda geniş şəkildə qeyd olunur. Nəsimi rayon İcra hakimiyyəti Azərbaycan Tibb Universiteti ilə birlikdə Universitetin akt zalında görkəmli oftalmoloq-alimin 94-cü ildönümünə həsr olunmuş “İnsanlara nur bəxş edən alim” mövzusunda tədbir keçirilib. Tədbiri giriş sözü ilə Universitetin rektoru, professor Gəray Gəraybəyli açaraq Zərifə Əliyevanın tibb elminin inkişafına mühüm töhfələr verdiyini, oftalmologiyanın aktual problemlərinə dair sanballı tədqiqatları, elmi-pedaqoji və ictimai fəaliyyəti ilə həkimlərin yeni nəslinin yetişməsinə və Azərbaycanda oftalmologiya elminin inkişafına güclü təsir göstərdiyini qeyd edib.
Nəsimi RİH başçısı Asif Əsgərov da çıxışında Zərifə xanım Əliyevanın həyat və fəaliyyəti barədə məlumat verərək qeyd edib ki, akademik Zərifə xanım Əliyeva respublikamızda tibb elminin inkişafına mühüm töhfələr verərək oftalmologiyanın aktual problemlərinə dair tədqiqatları ilə nəinki keçmiş SSRİ məkanında, həmçinin dünya miqyasında böyük şöhrət qazanıb.
Daha sonra Azərbaycan Tibb Universitetinin Oftalmologiya kafedrasının müdiri professor Paşa Musayev və həmin kafedranın dosenti Solmaz Əliyeva Zərifə xanım Əliyevanın həyat və fəaliyyətinin müxtəlif məqamlarından söz açıb, onun Azərbaycan səhiyyəsinə verdiyi töhfələrin əhəmiyyətini yüksək dəyərləndirib.
Sonda Nəsimi Rayon İcra hakimiyyəti tərəfindən 11 və 268 saylı xüsusi məktəblərin fiziki qüsurlu şagirdlərinin Bioloji Təbabət Klinikasında aldığı pulsuz tibbi müayinənin nəticəsi olaraq müayinədən keçmiş uşaqlara eynəklər təqdim olunub.
Qeyd edək ki, rayonun idarə və təşkilatlarında görkəmli alimin xatirəsinə həsr olunmuş bir sıra tədbirlər təşkil olunmub. Keçiriləcək tədbirlər sırasına rayonun orta məktəblərində, “Azərbaycan qadını” və “Ana müqəddəslik zirvəsidir” mövzularında inşa yazı, divar qəzetləri, bədii qiraət müsabiqələri, şagirdlərin rəsm əsərləri sərgiləri və s. daxildir.
