Rasif Bağırov: "Həyat və sağlamlığı təhlükəli vəziyyətdə olan, özünü qoruya bilməyən şəxsi bilə-bilə köməksiz qoymaya görə cərimələrin məbləğinin..."
Azərbaycanda xəstəyə kömək göstərməyən tibb işçiləri üçün, eyni zamanda həyat və sağlamlığı təhlükəli vəziyyətdə olan, özünü qoruya bilməyən şəxsi bilə-bilə köməksiz qoymaya görə cərimələrin məbləği 3 dəfədən çox artırılır.
Cinayət Məcəlləsinin 142.1-ci maddəsinə dəyişikliyin edilməsini nəzərdə tutan yeni layihəyə əsasən, qanunvericiliyə və ya xüsusi qaydalara müvafiq olaraq, xəstəyə kömək etməyə borclu olan tibb işçisinin üzürlü səbəblər olmadan tibbi yardım göstərməməsi nəticəsində onun sağlamlığına az ağır zərər vurmaya görə ödənilən cərimənin məbləği 1000 manatdan 1500 manatadək olacaq.
Hazırda isə bu hala görə cərimənin məbləği üç yüz manata qədərdir.
Xatırladaq ki, hazırda bu halı törədənlər Cinayət Məcəlləsi (CM) əsasında qeyd edilən məbləğdə cərimə və ya iki ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə bir ilədək müddətə islah işləri və ya bir ilədək müddətə azadlıqdan məhrum etmə ilə cəzalandırılır.
CM-ə edilən digər yeni dəyişikliyə görə, həyat və sağlamlığı üçün təhlükəli vəziyyətdə olan və özünü qorumaq üçün tədbir görmək imkanından məhrum olan şəxsi bilə-bilə köməksiz qoyma, əgər həmin şəxsi köməksiz qoyan onun qayğısına qalmalı idisə və ya onun özü zərərçəkmiş şəxsi həyat və sağlamlığı üçün təhlükəli vəziyyətdə qoyduqda, zərərçəkmiş şəxsə kömək göstərmək imkanı olduğu halda bunu etmədikdə şəxs 1000 manatdan 1500 manatdək miqdarda cərimə ilə (və ya bir ilədək müddətə islah işləri və ya altı ayadək müddətə azadlıqdan məhrum etmə) ilə cəzalandırılır. Qeyd edək ki, hazırda bu hala görə cərimənin məbləği 300 manatadəkdir. Bu dəyişiklik Milli Məclisin plenar iclasında müzakirə ediləcək.
Dəyişiklik barədə fikir bildirən həkim-ekspert Rasif Bağırov qeyd etdi ki, xəstəyə diqqət göstərmək, onu müalicə etmək hər bir tibb işçisinin borcudur: "Hansısa həkim xəstəni qəbul etməzsə və ya onu müayinə etməkdən imtina edərsə, o şəxs, təbii ki, qanunla cəzalandırılmalıdır. Çünki həmin tibb işçisi qanunun tələblərinə qarşı çıxır. Qanunvericilikdə qeyd olunur ki, xəstənin səhhəti pisdirsə, istənilən tibb müəssisəsində dərhal müayinə və müalicə oluna bilər. Qanunvericilikdə elə bir qayda yoxdur ki, xəstə ancaq öz ərazisindəki tibb müəssisəsinə müraciət etməlidir". Həmsöhbətimiz onu da əlavə etdi ki, ağır vəziyyətdə olan xəstəni həkim qəbul etmirsə, o tibb işçisi dərhal məsuliyyətə cəlb olunmalıdır: "Necə yəni xəstə hansısa rayonun qeydiyyatındadır, amma doğuş sancısı Bakıda tutub. Onda belə çıxır ki, xəstə sancı çəkə-çəkə rayona aparılmalıdır? Bu nə qanun, nə də insanlıq baxımından düzgündür".
R.Bağırovun sözlərinə görə, həyat və sağlamlığı təhlükəli vəziyyətdə olan, özünü qoruya bilməyən şəxsi bilə-bilə köməksiz qoymaya görə cərimələrin məbləğinin 3 dəfədən çox artırılması düzgün qərardır. Bu cərimə həkimlərin öz işinə daha məsuliyyətli yanaşmasına səbəb olacaq.
Günel CƏLİLOVA
