Kəmalə Ağazadə: "... çoxdan tətbiq olunmalı idi"
Azərbaycanda uşaq pornoqrafiyası yayanları ağır cəza gözləyir. Cinayət Məcəlləsinə dəyişikliyi nəzərdə tutan yeni layihəyə görə, uşaq pornoqrafiyasını dövriyyəyə buraxan şəxslər yalnız azadlıqdan məhrum etmə ilə cəzalandırılacaq.
Məcəllənin hazırkı variantına görə, uşaq pornoqrafiyasını yayma, reklam etmə, satma, başqasına vermə, göndərmə, təklif etmə, əldə edilməsinə şərait yaratma, yaxud yaymaq və ya reklam etmək məqsədilə hazırlama, əldə etmə və ya saxlamaya görə 8000 manatdan 10 min manatadək miqdarda cərimə və ya 5 ilədək müddətə azadlıqdan məhrum etmə ilə cəzalandırılır.
Yeni varianta görə isə, bu əməli törədənlər yalnız 5 ilədək müddətə azadlıqdan məhrum etmə ilə cəzalandırılacaq.
Ekspertlərin fikrincə, uşaq pornoqrafiyasını yayanlara qarşı cəza daha da sərt olmalıdır. Cəza metodunun maddi deyil, azadlıqdan məhrum etmə ilə olması daha münasibdir.
Uşaq eksperti Kəmalə Ağazadə "Bakı-Xəbər"ə açıqlamasında qeyd etdi ki, uşaq pornoqrafiyasını yayanlarla bağlı inzibati cəzanın həbslə əvəz olunması düzgün qərardır: "Mən bu dəyişikliyə sevinirəm. Uşaq pornoqrafiyasını yayanların azadlıqdan məhrum etmə cəzası çoxdan tətbiq olunmalı idi. Son vaxtlar sosial şəbəkə vasitəsilə kifayət qədər şantaj, hədə-qorxu, böhtan xarakterli videolar yayılır. Əslində, bu videoları çəkən şəxslər ya məktəblilər olur, ya da düşünülmüş şəkildə insanlara hədə-qorxu gələrək onları əldə saxlamaq üçün kadrlardan istifadə edənlər. Həmin videolarda çəkilənlər əksərən gələcəkdə insan alverinin qurbanına çevrilir".
Həmsöhbətimizin fikrincə, uşaq pornoqrafiyasını yayanlar, bir növ, insan alveri ilə məşğul olanlardır: "Onlar bu videolar vasitəsilə öz qurbanlarını əldə edir. Bu səbəbdən bu işlə məşğul olanlara qarşı daha da sərt cəzanın verilməsinin tərəfdarıyam. Onlara maddi cəza ilə mənəvi cəza tətbiq etmək lazımdır".
Günel CƏLİLOVA
