Hər il aprelin 26-da MDB, həmçinin Şərqi Avropanın bir sıra ölkəsində XX əsrin ən dəhşətli qəzalarından olan Ukraynanın Pripyat şəhərindəki Çernobıl Atom Elektrik Stansiyasının 4-cü blokunda baş vermiş qəzanın ildönümü qeyd olunur. Həmin faciəvi qəzada baş vermiş partlayış və yanğın nəticəsində yaranmış radioaktiv bulud Şərqi Avropanın böyük bir hissəsini bürümüş, həmçinin cənub istiqamətində hərəkət edərək böyük bir ərazini radioaktiv maddələrlə zəhərləmişdi...
Çernobıl qəzasının ildönümü ilə bağlı Nəsimi Rayon İcra Hakimiyyəti rəhbərliyinin qəzanın aradan qaldırılmasının iştirakçısı olmuş rayon sakinləri ilə görüşü keçirilb.
Nəsimi RİH-dən baki-xeber.com-a verilən xəbərə görə, mərasimdə çıxış edən Nəsimi rayon İcra Hakimiyyətinin başçısı Asif Əsgərov dəhşətli qəzanın tarixidən və doğurduğu fəsadlardan danışıb. Bildirib ki, qorxulu olay nəticəsində 7 min insan həlak olub, 25 min insan güclü radiasiyaya məruz qalaraq ömürlük şikəst qalıb. 300 min nəfər Ukrayna və Belarus əhalisi yaşayış yerlərini tərk etmək məcburiyyətində qalıb. A.Əsgərov deyib ki, II Dünya müharibəsi illərində Yaponiyanın Xirosima və Naqasaki şəhərlərinə atılmış atom bombalarının fəsadlarına bərabər tutulan bu qəzanın nəticələrinin aradan qaldırılması üçün o dövrdə analoqu olmayan «Sarqofaq» əməliyyatına SSRİ-nin bütün respublikalarından minlərlə insan cəlb olunub ki, onların 7 min nəfərdən çoxu Azərbaycandan olub. Təhlükəli və ağır şəraitdə işləmək bu insanların səhhətinə ciddi təsir göstərib. Onların bir çoxu normadan artıq şüalanmaya məruz qalaraq səhhətinə ciddi ziyan toxunub. Hadisədən artıq 31 il keçməsinə baxmayaraq, onlar hələ də bu qəzanın fəsadlarının ağrısını çəkir.
Tədbirdə iştirak edən “Azərbaycan Çernobıl Əlilləri İttifaqı” İctimai Birliyinin sədri Mirhəsən Həsənov bildirib ki, o vaxtlar sovet hakimiyyəti Qərb dövlətlərinə öz gücünü nümayiş etdirmək məqsədilə bu faciənin fəsadlarını gizli saxlamağa çalışırdı. Odur ki, qəzanın törətdiyi dağıntıların aradan qaldırılmasında iştirak edərək sağlamlığını itirmiş insanları taleyin hökmünə buraxmışdı. Vurğulanıb ki, yalnız ümummilli lider Heydər Əliyevin Azərbaycanda hakimiyyətə qayıdışından sonra Çernobıl əlillərinin sosial durumu yaxşılaşdırılıb, onların statusu müəyyənləşdirilib, sosial problemlərinin həlli istiqamətində ardıcıl tədbirlər görülüb, onlara dövlət tərəfindən müavinət təyin edilib. Bu qayğı Prezident İlham Əliyev tərəfindən də uğurla davam etdirilir. Dövlət başçısının təşəbbüsü ilə faciə iştirakçılarının müavinətləri dəfələrlə artırılıb, onların sosial müdafiəsi gücləndirilib. Çernobılçılar adından çıxış edən cəmiyyətin Nəsimi rayon təşkilatının sədri Xələf Həsrətov, “Qarabağ müharibəsi veteranları, əlilləri və şəhid ailələri” İctimai Birliyinin Nəsimi rayon şöbəsinin sədri Azər Quliyev və başqaları onlara göstərilən diqqət və qayğıya görə ökə rəhbərinə minnətdarlıqlarını birdiriblər.
Tədbirin sonunda Çernobıl əlillərinə maddi yardım və ərzaq bağlamaları təqdim olunub.
