Azərbaycan Respublikası Prezidentinin 2013-cü il 24 iyun 2966 nömrəli Sərəncamı ilə təsdiq edilmiş "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı" çərçivəsində 21 aprel 2017-ci il tarixində "Azərbaycan İstiqlal Muzeyi" əməkdaşlarının təşəbbüsü ilə Yasamal rayonu Şəfiqə Əfəndizadə adına 13 saylı tam orta məktəbdə "Narkomaniya - bəşəriyyətin bəlası" adlı tədbir-sərgi keçirilib.
Tədbirdə "Polisə Dəstək" İctimai Birliyinin sədri Şəmsəddin Əliyev Azərbaycan dövlətinin cinayətkarlıqla mübarizə siyasətinin səmərəsindən, DİN-nin Baş Narkotiklərlə Mübarizə İdarəsinin narkotik vasitələrin qanunsuz dövriyyəsi, narkomanlığın tarixi (Şamanizmdən), onun cəmiyyət, bəşəriyyət və genofond üçün təhlükəsi, bu cinayətlərin feminizmləşməsi və cavanlaşması barədə geniş mühazirə oxuyub. Tədbir şagird və müəllimlər tərəfindən maraqla qarşılanıb, verilən suallar cavablandırılıb.
Azərbaycan İstiqlal Muzeyinin əməkdaşı Arzu Quliyeva şagirdlərə narkomanlığa qarşı mübarizədə gənclərin maarifləndirilməsinin əhəmiyyətindən söz açıb, məktəbin direktoru Yaqut Sadıqova müəllifi olduğu "Narkomaniya" şeirini səsləndirib, narkomanlığın aradan qaldırılmasında yeniyetmələrin maarifləndirilməsi vacib şərtlərdən biri kimi vurğulanıb.
Tədbirin sonunda "Narkomaniya - bəşəriyyətin bəlası" adlı film və sərgi nümayiş olunub.
Baki-xeber.com
