Şəmsəddin Əliyev: "Vətəndaşların şəxsi əmlakının və ya dövlət əmlakının oğurlanmasına görə cərimələrin tətbiqinin o qədər də əhəmiyyəti olmur"
Azərbaycanda oğurluqla bağlı cəzanın sərtləşdirilməsi təklif olunur. Bu, Cinayət Məcəlləsinin 177-ci (Oğurluq) maddəsinə təklif edilən dəyişiklikdə əskini tapıb. Maddənin birinci bəndinin (Oğurluq, yəni özgənin əmlakını gizli olaraq talama) sanksiya hissəsində olan "500 manatdan 1000 manata qədər cərimə" "1000 manatdan 2000 manata qədər cərimə" ilə əvəzlənir.
Maddənin ikinci bəndinin (eyni əməllər qabaqcadan əlbir olan bir qrup şəxs tərəfindən törədildikdə, təkrar törədildikdə, yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə, elektron məlumat daşıyıcılarından, yaxud informasiya texnologiyalarından istifadə edilməklə törədildikdə, neft kəmərlərinə, dövlət və ya ictimai əhəmiyyətli təbii qaz, rabitə, elektrik, istilik enerjisi, su, kanalizasiya, dəmir yolu xətlərinə münasibətdə törədildikdə, xeyli miqdarda ziyan vurmaqla törədildikdə) sanksiya hissəsində isə "3000 manatdan 5000 manata qədər cərimə" "4000 manatdan 7000 manata qədər cərimə" ilə əvəzlənir.
Layihə Milli Məclisin plenar iclasına tövsiyə olunub və aprelin 25-də müzakirəyə çıxarılacaq.
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyev "Bakı-Xəbər"ə açıqlamasında qeyd etdi ki, tarixən cəzanın sərtləşdirilməsi ilə bağlı fikirlər səslənib: "Ancaq həmişə cəzanın sərtləşdirilməsinin ağır cinayətin qarşısının alınmasında o qədər də səmərəsi olmayıb. Müəyyən mənada mən cəzanın sərtləşdirilməsinin tərəfdarıyam. Sadə bir misal çəkim: canavar ət yemək vərdişindən əl çəkə bilmədiyi kimi, qəsdən cinayət törədənlər də öz əməllərindən əl çəkmirsə, deməli, cəza sərtləşdirilməlidir. Bu mənada quldurluq, soyğunçuluq və qəsdən adam öldürmə cinayətlərinə görə hətta müstəsna cəza tədbirinin tətbiqinin tərəfdarıyam".
Ş.Əliyevin fikrincə, vətəndaşların şəxsi əmlakının və ya dövlət əmlakının oğurlanmasına görə cərimələrin tətbiqinin o qədər də əhəmiyyəti olmur: "Söhbət dəyən zərərin tam həcmdə ödənilməsində gedir. İslam hüququ ilk dəfə oğurluğa görə sağ biləyinin kəsilməsi, ikinci dəfə isə sol biləyinin kəsilməsini özündə ehtiva edir. Bu gün də bu cəza bəzi islam ölkələrində mövcuddur. Cəzanın sərtləşdirilməsi budur. Mən oğurluq cinayətlərində azadlıqdan məhrum etmənin yüksək həddinin tərəfdarıyam. Bu, cəzanın sərtliyidir. Düşünürəm ki, belə prossesual addımın oğurluq cinayətlərinin qarşısının alınmasında səmərəsi ola bilər. Çünki şüuru, əxlaqı, mədəniyyəti olan insan özgənin əmlakına göz dikməz. Quranda belə deyilir və düşünürəm ki, biz belə davranmalıyıq".
Günel CƏLİLOVA
