Fatimə Hacıbəyli: "Bu cür ailələr kifayət qədərdir"
Hamı ailə qurduqdan sonra övlad arzusu ilə yaşayır, onun dünyaya gəlməsini, ilk addımlarını, ilk sözlərini xəyal edir. Lakin hamıya valideyn olmaq qismət olmur. Övladı olmayan ailələrin taleyi isə çox zaman boşanma ilə nəticələnir. Bəzi insanlar ailənin dağılmaması üçün müxtəlif yollara əl atır.
Belə ki, qohumlarının uşağını övladlığa götürür, övladlığa uşaq götürmək üçün dövlət qurumlarına müraciət edir. Amma bu proses o qədər də asan başa gəlmir. Bu səbəbdən də bəzi ailələr qohumlarının uşağını övladlığa götürür. Təbii ki, həmin valideynlərin etdikləri bu əməl qanunsuz sayılır.
Bu günlərdə Azərbaycanda qanunsuz övladlığa götürməyə görə cəzanın ağırlaşdırılması təklif olunub. Bu, Cinayət Məcəlləsinin 174-cü (Qanunsuz olaraq övladlığa götürmə) maddəsinə təklif edilən dəyişiklikdə əksini tapıb.
Dəyişikliyə əsasən, maddənin sanksiya hissəsində "100 manatdan 300 manata qədər cərimə" "1500 manatdan 2000 manata qədər cərimə" ilə əvəzlənir.
Qeyd edək ki, layihə Milli Məclisin plenar iclasına tövsiyə olunub və aprelin 25-də müzakirəyə çıxarılacaq.
"Vəfa" İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, hazırda uşaqların övladlığa götürülməsi prosesi olduqca çətindir. Övladlığa götürmə bütün dünyada ən məsuliyyətli məsələlərdən biridir.
Həmsöhbətimizin sözlərinə görə, bu gün övlad sahibi ola bilməyənlər uşaq həsrətinə son qoymaq üçün qanunsuz yolla övladlığa uşaq götürür: "Onlar yaxın qohumlarının uşağını övladlığa götürür. Bu cür ailələr kifayət qədərdir. Əslində, onları başa düşmək lazımdır. Çünki övladlığa uşaq götürmək proseduru olduqca çətindir".
Birlik sədri bildirdi ki, cəzadan öncə övladlığa uşaq götürmək proseduru sadələşdirilməlidir: "Prosedur qaydaları sadələşdirilərsə, o zaman qanunsuz yolla övlad sahibi olanlara qarşı cəza sərtləşdirilə bilər".
Günel CƏLİLOVA
