İlqar Hüseynli: "Ona görə də bütün bunların kompleks şəkildə qanunla tənzimlənməsi ən doğru həll yoludur"
"Azərbaycanda qəbiristanlıqlar, məzar yerlərinin qiymətləri barədə yeni sənəd hazırlanıb". Bunu Milli Məclisin İctimai birliklər və dini qurumlar komitəsinin sədri Siyavuş Novruzov bildirib.
Komitə sədri deyib ki, yaxın günlərdə nümunəvi qəbiristanlıqların yaradılması ilə bağlı ölkə Prezidentinin ya sərəncamı olacaq, ya da sənəd qanun layihəsi şəklində Milli Məclisdə müzakirəyə çıxarılacaq: "Bu sənəddə müxtəlif məsələlər nəzərdə tutulub. Sənədə görə, böyük yerlərdə qəbiristanlıqlar dövlətin balansında olacaq. Müəyyən yerlərdə isə, məsələn, kəndlərdə bələdiyyələrin balansına verilməsi nəzərdə tutulur. Sənəd tam hazırdır, bütün yerlərdən də rəylər alınıb. Yaxın günlərdə ya Milli Məclisdə müzakirəyə çıxarılacaq, ya da cənab Prezidentin bununla bağlı sərəncamı olacaq".
Deputatın açıqlamasından o da məlum olub ki, sənəddə qəbiristanlıqlar, məzar yerləri, başdaşlarının hər yerdə eyni cür və eyni qiymətə olması göstərilib: "Qiymət də elə yüksək deyil. Sənəddə nümunəvi qəbiristanlıqların idarə olunmasına, onların qorunmasına, təmiz saxlanmasına diqqət ayrılıb. Ritualların yerinə yetirilməsi üçün qəbiristanlıqlar təhsilli şəxslərlə təmin olunacaq. Bilirsiniz ki, bu gün qəbiristanlıqlarda mollaların çoxu heç ərəb dilini bilmir".
Bununla yanaşı, nümunəvi qəbiristanlıqlar bütün respublikanı əhatə edəcək. Ümumilikdə, sözügedən məsələnin qanun çərçivəsində tənzimlənməsi, bir növ, sosial sifarişdir və cəmiyyətin maraqlarına cavab verir.
Maraqlıdır, bəs sözügedən yeniliklərə münasibət necədir?
Məsələyə münasibət bildirən ekspert İlqar Hüseynlinin sözlərinə görə, bütün bunların qanunla tənzimlənməsi məqsədəuyğundur: "Məzarlıqlar qanunla tənzimlənməlidir və nə yaxşı ki, artıq buna start verilir. Qonşu Türkiyənin təcrübəsinə nəzər salsaq görərik ki, orada bütün məzarlıqlar və dəfn xidmətləri bələdiyyələr tərəfindən həyata keçirilir. Eyni zamanda, məzarlıqlara xidmət, ölçülərin müəyyən olunması, başdaşının standart ölçülərdə hazırlanması adıçəkilən qurum tərəfindən tənzimlənir. Hətta dəfnə din xadiminin gətirilməsi belə bələdiyyənin səlahiyyətindədir. Bütün bu sadalananlar eyni qaydada Azərbaycanda da tətbiq edilərsə, sözsüz ki, bu çox yaxşı nümunə olar. Həmçinin, yeni bir prosesin başlanğıcı olar. Problem ondadır ki, bizdə bəzi insanların məzar daşı qoymağa imkanı olmur. Məcbur olub borc-xərc edib bunu edirlər. Sonra bu onlara çox ciddi çətinliklər yaradır. Ona görə də bütün bunların kompleks şəkildə qanunla tənzimlənməsi ən doğru həll yoludur". Vidadi ORDAHALLI
