126 saylı orta məktəb - Şəmsi Qocayev: "Şagirdlərə vətən sevgisini daha yüksək səviyyədə aşılamalıyıq, əsl vətəndaş yetişdirməliyik və təhsilimizi inkişaf etdirməliyik"
119 saylı orta məktəb - Mətanət Mayılova: "Ölkə başçısının çıxışından belə mesaj aldım ki, biz uşaqlara elmlə yanaşı, milli dəyərlərin hər şeydən üstün olduğunu başa salmalıyıq"
111 saylı orta məktəb - Jalə Hacıyeva: "Biz öz tədris metodumuzu Prezidentin fikirləri əsasında qururuq"
Sentyabrın 15-i Bilik günü münasibətilə ölkə başçısı İlham Əliyev bir neçə orta məktəbin yeni binasının açılış mərasimində iştirak edib. Sabunçu rayonunda yerləşən 311 saylı orta məktəbin yeni binasının açılış mərasimində iştirak edən ölkə başçısı məktəbdə yaradılan şəraitlə tanış olduqdan sonra təhsil ocağının müəllim və şagirdləri ilə görüşüb. Görüş zamanı İ.Əliyev milli-mənəvi dəyərlərin qorunması, vətənə bağlılıq, təhsilin səviyyəsinin yüksək olması və digər məsələlər haqqında nitq söyləyib.
Ölkə başçısı İlham Əliyevin məlum çıxışı tək təhsil işçiləri üçün deyil, bütün sahədə çalışan şəxslər üçün önəmlidir. Bəllidir ki, Prezident bütün məktəblərdə ola bilmir. O bir sıra məktəblərdə olaraq öz fikirlərini dilə gətirir.
Maraqlıdır, sentyabrın 15-də 311 saylı orta məktəbin yeni binasının açılış mərasimində çıxış edən Prezident İlham Əliyevin nitqindən digər təhsil ocaqları hansı mesajları aldı?
Bununla bağlı paytaxtda yerləşən orta məktəblər arasında sorğu keçirdik. İlk olaraq Binəqədi rayonunda yerləşən 126 saylı orta məktəblə əlaqə saxladıq. Məktəbin direktoru Şəmsi Qocayev "Bakı-Xəbər"ə açıqlamasında qeyd etdi ki, ölkə başçısı öz çıxışında milli-mənəvi dəyərlərin hər şeydən üstün olduğunu bildirib: "Prezident İlham Əliyev demək istəyib ki, təhsilin kökü tərbiyə olunan uşaq və gənclərin vətəndaş olmaq ruhunda böyüməsidir. Hansı sınaqlardan keçdiyimiz gənclərimizə aşılanmalıdır.
Dünya mədəniyyətinə inteqrasiya olunmaqla yanaşı, milli mədəniyyətimizi, milli kimliyimizi qorumalıyıq və onu dünya səviyyəsində inkişaf etdirməliyik. Həmçinin, məktəblilərə yüksək keyfiyyətli təhsil verməliyik. Təhsilin keyfiyyəti 5 qiyməti ilə ölçülmür. Təhsilin keyfiyyəti deyəndə dövlətə, dövlətçiliyə sədaqət, vətənpərvərlik hissinin aşılanması nəzərdə tutulur. Bu sadaladıqlarım məktəblilərə aşılanmayacaqsa, təhsilin keyfiyyətindən danışmağa dəyməz. Söhbət ali təhsildən gedirsə, hər kəs ali təhsilli ola bilməz. Gəlin baxaq, milli qəhrəmanlarımızın neçəsi ali təhsillidir? Milli qəhrəmanlarımızın bir qismi orta məktəbdə oxuyarkən əlaçı olmayıb. Biz bu gün onlarla fəxr edirik. Mən təhsilin keyfiyyətini bu parametrlərlə ölçürəm: şagirdlərə dövlətə, dövlətçiliyə, vətənə sədaqət aşılanmalıdır, müəllimlər məktəblilərin azərbaycançılığı hansı səviyyədə qavradığını bilməlidir. Şagirdlərə vətənə hansı hisslərlə yanaşılması öyrədilməlidir. Dövlətimizə hər bir sahədə çalışmağı bacaran mütəxəssis lazımdır. Ancaq o mütəxəssislər peşəsindən öncə milli-mənəvi dəyərlərimizi sevməlidir. Mən Prezidentin çıxışından anladım ki, şagirdlərə vətən sevgisini daha yüksək səviyyədə aşılamalıyıq, əsl vətəndaş yetişdirməliyik və təhsilimizi inkişaf etdirməliyik".
119 saylı orta məktəbin direktoru Mətanət Mayılova qəzetimizə açıqlamasında bildirdi ki, 311 saylı orta məktəbin yeni binasının açılış mərasimində iştirak edən Prezident İ.Əliyevin nitqi ilə tanışdır: "İlham Əliyev dəfələrlə öz çıxışlarında milli-mənəvi dəyərlərin qorunması və vətənpərvərlik əqidəsinin aşılanması barədə fikirlər səsləndirib. Ölkə başçısının çıxışından belə mesaj aldım ki, biz uşaqlara elmlə yanaşı, milli dəyərlərin hər şeydən üstün olduğunu başa salmalıyıq. Vətənə bağlılıq, vətənpərvərlik, milli maraqlar məktəblilərə aşılanmalıdır. Prezidentin çıxışını əsas götürərək, məktəb direktoru olaraq müəllimlərə bu sahədə daha geniş iş aparmağın üstünlüklərini bildirəcəm".
111 saylı orta məktəbin rəhbəri Jalə Hacıyeva bizimlə söhbətində bildirdi ki, hər zaman dövlət başçısının fikirlərindən bəhrələnib: "İlham Əliyev ötənilki çıxışında təhsilin inkişafı üçün milli-mənəvi dəyərlərin qorunmasının vacib olduğunu vurğulamışdı. Biz öz tədris metodumuzu Prezidentin fikirləri əsasında qururuq. 2016-2017-ci tədris ilində də şagirdlərimizə dərslərin xırdalıqlarını belə öyrətməklə yanaşı, onlara milli-mənəvi dəyərlərin qorunub saxlanmasını izah edəcəyik".
Günel CƏLİLOVA
